孖妹S檔案：搵半新股醫肚先練眼力

七月份大市，股友喺股海即使搵唔到幾餐飯食，都起碼有啖粥水飲吓，不過去到上星期，大市冇焦點、冇動力，十足十食咗十香軟筋散咁，似乎要發吓吽豆先再重新上路。另一邊廂，近排唔少資金追逐半新股，搞到股價Chok過林峯，股友見到都流晒口水，呢類飄忽到阿媽都唔認得嘅股票，其實各具特色。

Kitty 彩兒

註：以近兩年上市的半新股比較

熊：友達資產管理董事熊麗萍

最一面天堂一面地獄惠陶集團（08238）

冧價兼盈警未好轉

彩兒：專搞時尚雜誌同廣告嘅創業板股份惠陶集團（08238），上年初首掛當日，較配售價0.37元，升逾9.7倍，收報3.97元，但累計表現跌足九成，用「來回地獄又折返人間」嚟形容佢都算貼切喇，雖然佢舊年大時代將股份面值一拆十而令股價爆升，但死揸到依家，屈指一算，跌咗95%，同Total Loss分別不大，中招者堪稱「地獄黑仔王」﹗

Kitty：惠陶集團上星期仲發盈警，話佢截至一六年九月底止九個月因為客戶數目減少，同埋戶外廣告業務蝕錢等，所以按年會有進一步虧損添，唔通真係黑氣未褪？

彩兒

惠陶集團低位徘徊

最反彈力驚人金誠控股（01462）

累升4.4倍母企撐腰

Kitty：香港人出晒名愛磚頭，買樓已成為港人夢想排名冧巴One，近月連建築股都好馨香，翠如BB股聯旺（08217）嘅彈起過程，簡直吸引全城眼球，我就發現另一隻建築股金誠控股（01462）嘅反彈力認真唔嘢小，佢一四年十月上市，當時建築股仲未係股友杯茶，首掛當日跌近一成，好慘豬，不過佢近期就愈升愈有，上市至今累升4.46倍。

彩兒：金誠前身係雅駿，佢依家主業都係以分包商身份喺香港提供屋宇設備工程服務，但盈利已由一四年約4,527萬元，縮水至舊年嘅1,925萬元，值唔值得買真係見仁見智。不過，好在母公司金誠集團係浙江最大財管機構，截至一五年底，管理資產超過300億元人民幣，可以憧憬母公司出手支持基建業務。

Kitty

金誠控股近月上揚

建築板塊表現參差

熊：近一年幾，接連有多間建築股上市，好似行業間都有股趁熱潮上市嘅風氣，真係要等一段時間，先睇得清楚佢哋上市意圖，究竟想賣殼定係其他？所以市場比較有戒心，亦以炒供求為主。

整個建築板塊好參差，上市前嘅業績或者好靚仔，但有機會係用低價取得合約而造成嘅假象，所以最緊要睇上市後幾次業績再作定奪，金誠盈利縮水，盤數一般，有興趣嘅投資者就要留意喇；不過佢主力香港業務，較主力內地市場嘅建築商嚟講，業務較簡單易睇。

最叻跳水冇水花親親食品（01583）

基本面曳高追小心

Kitty：親親食品（01583）係由恒安國際（01044）以介紹形式分拆上市，佢係內地果凍生產商龍頭，都有做膨化食品、調味產品、烘焙食品、糖果等，自家品牌包括「親親」、「香格里」等，以一四年零售額計，佢市場佔有率排第三。

彩兒：佢旗下啲啫喱夠晒Sweet，但係股價走勢嚇到持貨股友食幾多Sweet嘢都冇用，事關佢七月初首掛，單日股價插水冇水花，跌咗65.83%，到現時為止都仲未上番水面；公司一五年純利倒退30%，業績差嘅主因係果凍產品銷售出現大跌幅。雖然近期股價喺插水後見反彈，但顧及業績倒退，基本面唔理想，想高追嘅股友記住戙高床板諗清楚，以免中伏後要斬手指。

友達熊麗萍稱，分拆上市的股份首日掛牌有大機會出現沽壓。

Kitty

親親食品近期反彈

短炒無妨長揸恐危

熊：分拆上市嘅股份同以IPO或配售形式上市嘅股票有分別，分拆上市嘅股份首日掛牌有大機會出現沽壓，主因原本持有嘅基金或投資者，有機會因拆售業務並非投資目標，又或者市值唔合乎基金投資要求而先行沽出，股價要上市一段時間之後先反映到應有價值。

顧及同類型食品股表現參差，走勢波動，內地相關市場競爭又大，毛利受壓，我對相關股有保留，親親食品近期股價出現反彈，投資者小注短線炒作亦無妨，但高追長揸風險較大，我唔建議咁做。

最好食 Classified Group（08232）

餐廳攻大眾易靠穩

彩兒：我諗一眾生活喺「無飯家庭」嘅股友，對Classified Group（08232）應該會比較熟悉，佢主線係營運緊香港12間西餐廳，當中主力係休閒連鎖西餐廳Classified，做大眾生意；另外，有兩間行高檔餐廳路線，孖妹成日經過位於灣仔、前身係舊當舖嘅The Pawn，仲有間係位於銅鑼灣時代廣場嘅The Fat Pig。

Kitty：該公司七月中旬上市，首掛當日飆升4.72倍，之後股價似足過山車，近期又重新上路，上市後累升2.27倍。