Market Insight：家電股勢突圍而上

自六月底公投以來，港股一口氣由兩萬點樓下，升至22,300點遇到阻力，近幾日確實有迹象市底進入橫行消化期，指數在10日線水平上上落落，靜待下一輪突破的機會。

英公投後，預期歐、英、日、美的貨幣政策有鬆無緊，環球股市跌唔夠兩日，經已掉頭出現恐慌性掃貨，令人意外係中國股市一副與世隔絕的態度，而且一度以為即將耗盡，可以炒擴容的港股通，七月初港股急升之後，似乎內地基金有食胡手影，由之前日日淨流入十多二十億元人仔，到近十個交易日所見，半數日子錄得淨流出。

儘管金額唔高，但餘額去到480億至500億元人仔就無再減少，擴容甚至深港通消息，突然石沉大海，縱觀外圍升勢漸見放緩，八、九月港股能否更上一層樓，恐怕此乃關鍵。

創維科龍夠搶眼

內地消費類股份沉寂多時，近排部分行業已漸見復甦瞄頭，最先發圍的汽車及家電板塊，前者在下近期介紹過唔少，見七月銷情熱度不減，估計出完中期業績後，有條件谷多浸，博下半年業績重估。

家電股創維數碼（00751）及海信科龍（00921）近排也是相當搶眼，創維近月銷售增幅持續高企，強勢有因，近排A股熱炒「十三五」家電升級，以及樓市銷情熱爆，滯後出現的白家電銷售高潮，海信科龍順理成章成為內地南下的首選。

見消費股有起色，第一時間諗起愛股統一企業（00220），事實即食麵減價戰落幕，幾個大玩家成功迫使低價路線的競爭者，近排統一、康師傅（00322）趁機進軍高價碗麵市場，毛利率谷底反彈可期，睇統一於六月上旬開始，市升佢唔升，上周五終於見大陽燭收，估值唔貴，今次應該輪到佢。

「AI/VR概念」展現強勢信號

「東網Money18」強勢推出「板塊追蹤」，繼續為讀者捕捉最當炒之股份，其中全港獨有之「一帶一路」、「AI/VR概念」及「明星概念」板塊持續展現強勢信號。以上周五為例，「AI/VR概念」穩守板塊升幅榜第二位，升幅2.6%，大幅拋離恒生指數之1.4%升幅，可見資金續流入該板塊。要掌握最貼市之炒股資訊，「板塊追蹤」絕對係好幫手。

體品股要睇策略

里約奧運已經開幕，如果話奧運掀起運動熱潮，似乎呢股熱潮係安在家中睇直播、商場做推廣吸引人流，試問有幾多人平時唔願郁，因為一個奧運而落街做運動？一啲內地體品股上周五借勢炒上，安踏體育（02020）及特步（01368）分別升5.2%及3.2%，匹克（01968）及李寧（02331）微升約0.5%，而今年中國隊官方贊助商361度（01361）則無升跌。

安踏同李寧上周有大行唱好，德銀預計兩者中期業績有改善，給予「買入」評級。瑞銀亦都睇好安踏，指其新業務增長可抵銷傳統街鋪銷情一般的影響，將評級升至「買入」，目標價上調至22.5元，意味較上周五收市價（18.8元）有近兩成水位。

安踏上周連升兩日，成交配合，若可突破250日線19元並守此水平，有機上21元，不妨順勢短炒一轉。早前內地出台《體育發展「十三五」規劃》，其中目標包括到二○年，全國體育產業規模超過3萬億元人仔，除咗大型國際品牌，安踏、李寧同特步在內地都係較知名品牌，現時市場上好多人分餅，高速增長時期已過，應睇企業用咩策略保持增長。

古勝