聯儲局議息過後，市場逐隻字秤認定今年會加息，加埋之前日本央行誓神劈願話唔會「直升機撒錢」，恐怕若三幾個月前發生，港股已插到七彩。昨日好友大戶守尾門，頂到結算完畢，而且三點過後，幾隻二三線股見斬倉暴瀉，恒指一度借勢急瀉，在結算價十拿九穩下，現貨一樣見到買番轉頭，跌幅大為收窄。
從上述三點，似乎英國脫歐後引發資金回流亞洲新興市場的威力猶在，令大市即使超買完再超買，依然唔肯掉頭先來個調整。
值得留意，是周二、三恒指即市波幅依舊未離開21,890至22,300點，高位波幅收窄待變的形勢未變。
昨日10日線已升至21,950點，進一步貼近即市波幅低位，筆者不敢貿然開好倉，就是怕超買市況遲遲唔肯回下，若觸及甚至跌穿10日線，可能會引發短期平倉潮。繼續破位追勢策略，恒指升穿22,300點至多追貴少少，反之如再向10日線走近，要有兩手準備，可以細注試沽但不宜過市。
John Mullen