Market Insight：汽車股升勢夠凌厲

與上次議息剛在英國公投前充滿變數唔同，家陣塵埃落定，加上六月美國非農職位遠勝預期，預咗聯儲局會打兩手牌，替隨時加息開定後門。昨日大行較樂觀的估計最快九月，惟利率期貨顯示，十二月先加息的機會也僅五成，除非七、八月就業數據熱爆，令聯儲局急急出手，況且十一月總統大選，一切維穩先行已無懸念。

古勝認為，年底美國加一次息已屬超額完成，唔好忘記日、歐央行準備擴大量寬，夾手夾腳齊齊競貶兼谷高美金，美國經濟年底前要維持活力，非想像中容易。

期指結算日，尾市見一堆不見經傳的二三線股排住隊被斬倉，大市一度插低165點，仲以為期指大戶收夠籌放軟手腳，點知七月期指結算平均價早就塵埃落定，好友等緊派彩之下，個市仲可以拗腰，最終僅跌44點報22,174點。

埋單計數，英國脫歐後恒指由低位累積反彈2,512點，啱啱英國先揀完蟀同歐盟講數，可是脫歐副作用包括放水預期升溫，以及熱錢回流新興市場，已率先在股市發酵，金融市場氣氛逆轉之快，真係一日都嫌長。

地產股升浪未完

唔單止股市小陽春，香港樓價早於英國公投前已有見底迹象。近日有新界上車盤低位勁彈兩成五，內地大款也取代英資華資，在山頂四處掃貨，紀錄破完再破。

樓價升勢呈現M形，唔係最平就係最貴的先行，最終M字中間的大多數，最後唔跟得上？在下無咩意見，但有單親身經歷，近排老友為仔女返學需要，三十幾度大熱天時，陪佢四圍搵樓租，不但只鎖匙盤少，經常幾枱客企喺大堂排隊等，睇完唔夠半日就畀人捷足先登，租盤租金硬淨，咁情況下，樓價要跌真係唔易，本地地產股被重估的升浪，應該仲未有耐玩完。

汽車股升勢未盡，特別係吉汽（00175）同東風（00489），吉汽由二月低位2.76元反覆向上，今個月升勢更凌厲，屢創新高，昨再升5.1%報5.31元，接近翻一番。

東風近月大反彈，上月底跌到落7.51元，昨日高見9.92元，追落後之勢不容小覷。日前集團公布東風本田上半年銷情理想，仲將全年目標上調至50萬輛，大行亦唱好，其中滙證睇12.7元，瑞信更睇13.9元。

福耀玻璃可低吸

中國上半年乘用車銷量按年增長9.5%，單計六月按年增近兩成，按月則有所放緩，下降3.3%。不過，隨着下半年仍有唔少車企陸續推新車，相信銷量會維持在高水平，相關行業如汽車玻璃股可搭順風車，當中可留意行業龍頭福耀玻璃（03606）。

去年業績中，來自中國市場的收入佔總收入近67%，按年增長5.5%，海外業務亦有4%增長。今年首季收入升一成，賺5.8億元人仔，微增0.6%，業務平穩增長。該股股價現已升近20元，乃去年十二月以來主要的阻力位，若未能上破，有機會回試18元水平，屆時看官可候低吸納。

古勝