又話香港大力支持金融科技（Fintech）同初創企業，絲絲又睇住一間港產流動支付Startup因為香港發展掣肘多，結果被「趕」入內地發展。
港產初創公司報貝（CamClaim）創始人兼首席執行官林籽妍（Joey）搞咗個App，專處理公司與員工出差報銷Claim錢事宜，報資料、收錢都可用手機處理。
可惜香港掣肘多，Joey聯絡香港銀行、金管局都無辦法解決App內牽涉嘅錢銀問題。喺香港想自立門戶拎個儲值支付牌，資本要求加埋其他使費坐底3,000萬，邊畀得起？又無銀行肯合作。結果CamClaim返內地發展，同銀聯合作，個App已成功上架。
喺香港發展？似乎十劃未有一撇。
余絲韻