facebook上季業績靚到呢，股價即刻勁彈，查實fb老細朱克伯格從來只憑一條問題開會Brainstorm伙記。問乜呢？
有位fb舊伙記爆料話，每次度出絕世賺錢好橋向朱仔Sell時，朱仔永遠只問呢句「呢樣壯唔壯大到公司先？」答唔出個「得」字？朱仔即刻冇興趣。即係點？朱仔好明確清晰只專注一個目標。
阿舊伙記後來自己搞交易網站，學足朱仔，話公司目標唔使多，大目標每年一個就夠，然後再將個大目標拆分為每月、每日嘅短期目標。例如目標想一周內增加十萬個用戶人數，就要諗可以做邊三樣嘢嚟達標。
查實，阿舊伙記只跟咗朱仔九個月，就因為向媒體洩漏天機被炒，但都「不計前嫌」讚朱仔，證明朱仔呢招並唔係流嘅。
余絲韻