絲絲講場：真‧長情一份工做62年

佢就係宏利（00945）高級理財策劃顧問孫永祚（Joe），自一九五四年開始佢就一直喺宏利做代理，中間冇跳過槽、冇轉過工，今年即將踏入91歲喇。

聽力差更用心聆聽

阿Joe年輕時喺上海大學讀經濟，畢業後教書，四十年代政局動盪，佢南下來港，喺進出口公司做咗幾年後公司結業。見有外資行喺報紙賣廣告請人，佢自問英文唔錯，就寫信應徵，「第二日拆信先知係宏利，賣保險嘅！」

佢自細右耳聽力麻麻，填面試表時果然畀考官質疑。「我同佢講，我聽力唔好，所以更用心聆聽客戶嘅說話。」就係咁，阿Joe喺芸芸400名應徵者中脫穎而出，成為七位入圍者之一。「其實呢句答案，我當年籌備咗好耐！」

自掏荷包墊支保費

第一張保單總係令人特別印象深刻。阿Joe話，當年宏利津貼唔多，自己人脈又唔廣，剛開始嘅代理生活過得唔容易。朋友見佢心事重重，就介紹佢搵另一個朋友試吓，就咁Friend搭Friend，阿Joe終於「開到齋」。「我第一時間計吓有幾多佣金落袋，都有成800蚊！」佢依家講起都仲好興奮。雖然嗰個客冇如期交保費，要阿Joe掏荷包墊支，但諗番佢覺得值得，「因為呢張單畀咗我好大信心做落去！」

成功「開齋」後，阿Joe開拓新客源，直頭跟住本Hong Kong Blue Book（香港政府檔案）去唔同政府機構拜訪啲公務員，就係咁慢慢建立自己嘅事業，仲結識埋同一公司做嘅太太。至今已足足做咗大半個世紀，佢依然退而不休，不定時坐鎮辦公室，歡迎啲客搵佢傾偈。

余絲韻