絲絲講場：澳至尊主席演繹「愛家男」

尋日短短一個鐘左右嘅招股記者會上，蔡主席講咗不下十次佢同太太（亦即係公司執行董事）何家敏一齊嘅嘢。佢哋夫婦十幾年前創辦公司，點樣由兩個人發展到依家公司規模有200人，由當初只賣5款產品到依家產品種類近100款咁！

仔女生日拼成上市編號

蔡主席仲提到舊年12月3號遞交上市申請表嗰日，就係佢哋結婚15周年紀念日，仲話咁「包保唔會唔記得！」

唔單止咁，「愛家男」蔡主席仲自爆連上市編號「2031」都有特別意思：「20號係我囡囡嘅生日，31號就係我囝囝嘅生日。」佢仲話一對仔女都有份拍澳至尊廣告，「同張晉打拳嗰個就係我囝囝。」

余絲韻