絲絲講場：富臨CFO訓練精靈捉商機
連上市公司高層都做埋寵物小精靈訓練員？仲係被迫嘅？
邊位？就係富臨集團（01443）CFO（首席財務官）伍鑑津。
爭取同任天堂合作
《Pokémon GO》上架第一日，呢位CFO已經叫同事留意住集團旗下餐廳附近有冇PokéStop（補給站），唔單止咁，佢仲潮到做埋訓練員添。佢哋仲有爭取緊同任天堂及其他遊戲開發商合作添。
佢話一開頭係被迫去玩，但玩落之後又覺得幾好玩。
連上市公司CFO都逼住要玩，都係為盤生意。《Pokémon GO》大熱，就連最近海外新樓盤廣告都Sell話「本樓盤地點就近PokéStop，在家就能捉精靈」！做生意點可以執輸？所以話，CFO唔易做。
商場放餌誘「小智」
啲商場好似新地（00016）旗下嗰5大，都定時放櫻花Lure（誘餌），話吸引稀有小精靈現身喎，實情無非係為咗吸啲走晒落街嘅訓練員！
連世邦魏理仕香港顧問及交易服務—商舖執行董事連志豪都話，本港零售依排咁弱，《Pokémon GO》短期可以刺激到本地消費。
商機嘅嘢，大有大做，小至請槍做「小智」亦一樣有得做。絲絲尋日晏晝見，eBay已有近20個香港嘅《Pokémon GO》帳戶上架，最貴叫價2,050元，去到Level 26，仲聲稱收齊晒所有小精靈添。
所以？所以連絲絲都要聽少隻黑膠，用啲時間去Download個Game。所以話，搵食艱難。
余絲韻