孖妹S檔案：收市競價有得玩 散戶點嘜股？

滙控「經典」料難重演

吳：中國銀盛資產管理董事 吳家順（Thomas）

Kitty：收市競價時段當年咁短命，你仲有冇印象？

吳：當年滙控喺時段內被質到落33元，有股評人仲喺電視節目喊，呢啲係集體回憶，點會唔記得？不過，我當年有利用收市競價時段炒賣，但大多數都冇好結果，都冇撈到滙控貨。

其實，喺事件發生前，已留意到有大戶測試緊個市場極端性，已覺得唔對路，後來就抱一心食花生，睇好戲心態睇成件事……其實人腦好特別，面對逆境時，就會好負面，加上當年係金融海嘯之後，有大行唱滙控會跌到落22至25元，一般散戶唔會有膽入市。

吳： 當時有朋友亂咁Set價，撞手神喺33元入到滙控嚟短炒，隔咗兩日就出貨，賺到十幾個巴仙，不過呢啲完全係好運性質。其實，當年係有好多競價盤原本想喺約38元出貨，但及後估唔到股價會插到落去33元，好被動地沽出持股。

彩兒： 散戶喺收市競價時段搵飯食，會唔會係以卵擊石咋？

落限價盤控制風險

吳：現時收市競價時段設立正負5%波動上限，相信滙控經典事件重演嘅機會唔大，不過，呢個時段主要用處都係畀基金或大戶完成配對或入齊貨，若散戶想試玩，都有機會偷雞碰運氣，不過最好就落競價限價盤去控制風險，以防股價有不尋常波動，免成交價同想像中有太大出入。

吳：市場向來會憧憬成分股轉換，基金會喺臨收市掃貨，仲會引來炒作，未來掃貨動作或延至收市競價時段追貨，股友亦可係恒常開市時買入，再喺收市競價時段沽出。

Kitty：你數口咁精，究竟仲算到啲乜？快啲從實招來！

吳：現時港股環境同○九年已經唔同，當年滙控係最大權重股，但今非昔比，今日恒指佔比最大係騰訊（00700），例如見騰訊喺收市競價時段跌5%，相應即係代表恒指跌咗約110點，若見到恒指未跌，就可以追沽恒指喇，所以有數得計（口架）。

留意歐市影響港股

吳：英國脫歐，歐市更趨波動，喺夏令時間，歐股係香港時間三點開市，但冬令時間係四點先開市，所以收市競價時段重疊喎，一旦歐股有乜事，想轉身都易啲。衍生工具炒家就要留意，由於輪證在競價開始前已經收市，輪證價格所反映的，是相關資產喺四點嘅價格。

博吓大霧 順勢而行

胡：專業投資者　胡李察

彩兒：你一九八七年開始炒股，見慣晒風波，早已經視股市波幅如浮雲，近排港交所重推收市競價時段，你點睇先？

胡：佢仍然都係基金同大戶嘅玩意，對於散戶嚟講，作用唔大，亦冇乜搵食空間，不過都可以試吓博大霧，搵番兩餐嘅……個人嚟睇，最緊要就抱住「順勢而行」同「勿撈底」嘅心態，若然股份強勢，走勢向上嘅，咪照落競價限價盤，可嘗試將個價Mark低啲，博有人唔想持貨過夜，你咪可以接平貨！

胡：另外，股價向上時，好多時啲沽空盤，沽凸咗需要補番倉，又或者有篤手指嘅盤，需要急住入貨，所以有貨喺手，就不妨試吓掛高價啲，博人急住買貴貨。所以依我感覺，呢個只係大家「鬥掛」嘅遊戲。

圖表派慎防被愚弄

Kitty：你似乎有啲陰謀論想發表吓？

胡：我覺得股友要小心被大戶愚弄囉，因為有唔少人係圖表派，佢哋特別容易中招……畫圖表係以收市價為準，所以有啲大戶會特登Mark高少少，等第二個交易日會搶高一、兩個價位，主因照理論嚟講，大陽燭高收意味住股票走勢向好，所以記住睇埋其他指標做嘢喇。

彩兒：孖妹試玩嗰陣，一於Whatsapp你齊齊研究吓先。

若有料報畀彩兒同Kitty或有嘢問，可電郵money.biz@on.cc

彩兒　Kitty