港股終於要回，周末假期前夕，大戶入市興趣減低，從主板成交額由上周四652億元縮至周五僅519億元已可見一二。
值得留意，沽空佔大市成交比例回落至9.3%，市況靜局套戥需求減低之外，多少也反映現貨沽空搵食的淡友，在一連兩星期被狂挾千四點之後，開始棄暗投明，惟股市永遠是少數人贏大多數輸的英雄地，淡友轉軚是否預視短期見頂，本周初市況應有啟示。
上周五恒指微跌36點收21,964點，現貨成交愈玩愈縮，有利好友大戶於午市後加多兩錢肉緊，經已輕易把現貨指數跌幅收窄，日市期指收21,992點，高水28點，成交縮減至7.6萬張，全日高低波幅只得140點，實是水盡鵝飛，即市炒家搵食唔易。
筆者唔估頂而上周一直以前一日期指低位，作為翌日好倉止賺，上周五期指開21,931點，隨後試落21,859點，跌穿上周四的21,906點，終把今浪所開的好倉全部食胡，無倉一身輕度周末。
考慮到現貨成交持續縮減，MACD及RSI初現背馳，今日重開「勁假時段」，實行睇定先不急於開倉，一於睇多日。
John Mullen