北水頭等倉：上實勝在四平八穩

港股通總餘額僅餘四百多億元人民幣，見到近周港股通資金流入明顯減少，但相信不代表北水對港股熱情減退，只係盛傳深港通會在八月中、下旬才公布，若仲係每日十幾廿億咁去，未必拖得到下月佳期，所以暫收番細個水喉都唔出奇！

央企改革陸續有來

第三季以來，港股穩步向上，恒指唔驚唔覺已回升至接近22,000點水平，已升至上落區阻力位，到底係沽貨獲利，抑或繼續持貨，甚而繼續加注，倒是投資者最關心問題。不過，觀14日RSI為66，未算是好超買，照計可以睇多一陣，相信七月底期指可維持在高位結算。

近月央企改革先後有中旅及中糧系的消息，相信未來數月會陸續有來。除了如從事旅遊的中旅及從事糧油食品的中糧兩大事業集團的重組外，相信地方國企改革亦係重組的對象。

本來，上海是全國金融中心，上海市政府旗下掌控的公司不乏滬、港皆有上市公司，但上海市在港的窗口公司——上海實業（00363），礙於紅籌身份，一直未能染指母公司金融相關的資產投資，隨着金融改革推進，未來會否有變就不得而知。

上實現時的業務包括投資房地產、水務、公路及基建等，業務大致上相對穩定，上周五收報18.3元，現價市帳率僅0.55倍，往績息率有4.4厘，在眾多大型紅籌股之中，估值算是吸引。

回看今年以來的股價走勢，首季下試15元水平支持後回升至17至18元水平徘徊，短線若能以大成交攻破19元阻力位，季內目標反覆向上挑戰去年末季21至22元水平，失守17元止蝕。

司慕渢