Market Insight：電訊股有條件砌上

上周五港股回吐，恒指跌36點報21,964點，主板成交僅僅過500億元，沽空比率更創今年新低，可見基金於高位唔多願追，相反做淡的亦輸到怕怕，暫且收手，陷入高位膠着狀態。藍籌入面，至悶的中電（00002），周息率得3.3厘，依然不乏大戶捧場，股價曾見82元歷史新高。

今時今日，瑞、德、日十年國債跌到負息，美國十年債得厘半，需要定息回報的保險與養老基金一類投資者都幾絕望，退而求其次連高息股都照殺。

基建公用股板塊中，三隻中資電訊股都算被忽視，睇返六月營運數據唔錯，4G上客開始趨穩定，早排瑞信先有報告話以現時4G市場的均衡上客表現，監管當局出手干預風險頗低，三隻電訊股周息率介乎2.5至2.8厘，在業績見底而任何有yield的股份都有追落後之情況下，古勝依次先揀中移（00941）、中電信（00728），最後先到聯通（00762）。

炒iPhone概念要睇路

眨眼快到九月，近傳統蘋果公司iPhone推出日子，唔少爆料網站經已率先揭開iPhone 7的神秘面紗，近排蘋果概念股已見偷步炒起，因為新一代好可能有雙鏡頭機款的關係，早排幫華為研發雙鏡模組在旗艦手機P9的舜宇光學（02382），掃到甩碌創埋52周高位，液晶顯示屏生產商信利國際（00732），上周五亦由頭升到尾，升7.3%報4.1元，反而飲蘋果公司奶水大的瑞聲科技（02018），上周四破過70元關創歷史新高，周五回返多少報收70.05元。

近排流出的間諜iPhone 7圖片，作為果粉之一，古勝是頗失望，基本機背天線膠邊抹掉之外，同過去兩代一模一樣，雙鏡頭華為經已用緊，百分百食老本feel，睇美國屢創新高蘋果公司股價仲比一五年歷史高位低出近四分之一，事出有因，看官們七、八月炒概念股，要知有所進退。

「比卡超」的威力真係非同小可，唔少《Pokémon GO》玩家實在太投入，搞到掟爛部電話、撞車、誤闖鄰國邊境等，喺俄羅斯仲有銀行因此而為客戶提供免費的意外保險。傳聞《Pokémon GO》月底將登陸香港，相信到時街上會多咗唔少低頭族，玩之餘真係要注意安全！

任天堂股價猶如坐火箭一樣，喺香港上市、擁有AR（擴增實境）概念的股份亦借勢炒上，網龍（00777）上周五曾升至27.5元，創七個多月以來新高，而近月持續在低位橫行的聯想集團（00992）亦由4.6元水平反彈至上周五收報5.28元。

網龍有勢挑戰高位

聯想同Google的AR平台Tango合作，預計九月推出AR手機，集團仲話最快年底前有AR遊戲，究竟可唔可以食住AR個勢翻身？在下就心存疑問。事關聯想本業個人電腦及智能手機業務持續下滑，去年業績由盈轉虧，蝕近1.3億美元，並拖累股價表現，而AR業務屬起步階段，未有實質成果，對集團的貢獻有幾大，以及能否藉此扭轉頹勢，真係言之尚早。

相反，網龍更值得留意，集團本身做手遊，已經逐步發展、應用VR同AR技術，仲將相關技術用於教育業務。集團首季收入增長逾一倍，毛利按年增長67%，惟早前收購的普羅米休斯錄得虧損，加上匯率虧損，令其錄得1.14億元人仔的虧損。

走勢上，其股價早前跌至23元水平現承接，走勢改善，上周五一度突破四月高位27.2元，短期內應可反覆挑戰29元。

古勝