基金：嘜價博懵機會唔多
港交所（00388）今日重推收市競價時段，有基金經理表示，雖然對個別指數基金及長倉基金於特定日子有一定作用，但整體日常運作實際影響不大。豐盛金融資產管理董事黃國英直言，雖然可以「博下懵」短炒，但相信機會一年或只會有一至兩次！
黃國英說：「基金經理買賣策略唔係取決於一、兩個價位，更不會等收市先做嘢，一般投資者沒有必要將有關機制睇得太複雜。」他解釋，對指數基金而言，基金經理因應指數成分股變動而需增減持個別股份時，競價安排會有一定作用，但對其他基金經理的日常操盤，根本不會有影響。他又稱，從短炒角度來說，「嘜個價博下懵唔係唔得，但畀你博到的機會每年最多一、兩次，真正意義唔大。」
留意周五7月結
易方資本投資總監王華認為，相對歐美市場，港股交投無疑較少，競價結果對市況的潛在影響，理論上較大，但因並非所有在港交所掛牌買賣的股份會進行收市競價，同時競價有波幅限制，未必影響日常操盤。不過，王華表示，月結、季結或指數組合調整的特定日子，不排除有個別長倉基金作大手買賣，以影響投資組合在結算日的表現，有關情況對本周五的七月結影響，仍然值得觀察。