近年不斷有經營茶記、酒樓以及西餐廳的餐飲集團於主板和創業板上市。不過，by common sense都會知道，搞飲食的只是現金流多，但是，其實利錢並不高，除非你是搞高檔次飲食啦！
高檔到好似Harlan's咁──我同太太只是叫了兩碟豬扒飯加兩杯凍飲來慶祝結婚紀念，已經盛惠八舊水喇，這些咪就係做大生意囉！
之不過，經營Harlan's同田舍家爐端燒的母公司同景新能源（08326，前稱「JC Group」）都已經把業務的方針連埋招牌轉移到光伏同太陽能的層面上喇，你認為高檔次的餐飲係咪真係有得做呢？
為人民幣服務的翠華（01314）於上月二十八日公布了去年業績，純利按年跌54.5%，股價一度落到1.17元的新低，較一三年十一月5.75元的高位累計挫逾八成！純利大跌的原因？無他的，一個焗飯又唔跟餐，加杯正價檸茶都要成舊水落樓。
你認為他們的目標客群是本地人嗎？我自問好少幫襯翠華，唯一令我感覺到非吃他們不可的，就只有於清晨離開蘭桂坊而感到肚子空空的時候，（戴番個頭盔先）那已經是十年前的事啦！
周三翠華宣布了潛在的控股權易手，大股東向買方出售相當於已發行股本62.28%的權益，刺激股價反彈，並於昨日收報1.49元。內地人來港的人數和消費意欲下降，一直困擾住本港的餐飲市道。
作為老闆的，把生意善價而沽，是再順理成章不過的一件事。然後我又想，對於一些尚未上市而又符合上市基本條件的企業老闆，反正前路茫茫，為何不把業務推上市之後（哪管是創業板）再攞個靚仔的市盈率？然後坐到到期喇，便轉行賣殼，之後就可以印印腳歎世界囉，你話幾寫意呢！
富昌金融研究部總監 譚朗蔚（作者為註冊持牌人士）