絲絲講場：央媽調控藏酸辣密碼

人民銀行近年少咗直接減息降準，成日用乜乜乜工具調控流動性。於是乎，中國金融界近期就用咗重慶著名食物去代表呢批工具，仲攞埋嚟做暗號添。開講都有話「民以食為天」，應用喺金融市場一樣得，好似「央媽煮酸辣粉」，就係當中嘅表表者。

中國金融界將人民銀行比喻做「央媽」，覺得佢煮得一手好菜，尤其係「酸辣粉」（SLF，常設借貸便利）同埋「麻辣粉」（MLF，中期借貸便利）；仲有小食「酸辣藕」（SLO，短期流動性調整工具）。如果唔受得辣，就有「怕酸辣」（PSL，抵押補充貸款）。比喻到咁好味，以後睇住個市實好易肚餓！

其實亞洲金融工具好早期已經用食物代號，講得最威水就梗係香港發行嘅「點心債」（離岸人民幣債券）。由於香港一直係龍頭，有金融機構甚至會將點心債，做埋成個離岸人民幣債券市場嘅統稱。

余絲韻