絲絲講場：領展搵譚仔教生意辣招
領展（00823）商戶學堂啱啱邀請咗城中名店譚仔三哥米線嘅創辦人，就係譚澤群（三哥）同埋佢嘅六弟譚澤強（強哥），同班商戶分享營商心得。實情譚氏兄弟有乜嘢辣招，可以喺零售及飲食業淡市中發圍呢？
六弟強哥坦白講，商戶最重要係產品，就好似阿媽煮(食送)，如果唔好食，你都唔會返屋企食飯，真係阿媽都冇面畀。不過，小商戶都唔好睇小社交媒體嘅威力。早前公司慶祝成立廿周年，將創業經歷和心態拍成微電影喺社交媒體播放。強哥話，起初諗住有10萬次點擊已經要慶功，點知淨係兩日就達標，一個星期仲有成八十萬次點擊，段片變成大眾嘅集體回憶，仲威到去海外，真係估佢唔到。
51間分店 未諗上市
強哥又話，一間企業嘅成功，唔係單一元素令行業可以生存，三哥對食品嘅質素要求係功不可沒。三哥就笑笑口，話自己每日唔行街市會唔舒服。
講到公司由○八年唔夠10間分店，短短八年間，今日開到51間分店嘅規模，當中7間仲喺領展旗下商場。
香港「沸」青舞贏內地
三哥仲話，今年佢哋計劃再喺全港開多3至4間分店，想維持營業額每年有雙位數字增長。而佢目標計劃拓展大中華市場，不過就梗係要啲時間認真研究先啦。至於有冇諗住上市？強哥就話，暫未有計劃。
另外，領展資助香港街舞冠軍協青社，啱啱出戰喺北京領展旗下嘅北京歐美匯購物中心舉行嘅全國大賽。結果協青社派出嘅香港代表隊，打低超過1,000個舞林高手，攞咗3人隊際賽冠軍及單人賽亞軍，果然係沸青，熱血沸騰個沸呀！
余絲韻