理財Campus：11年炒贏2千萬 多得「小強」

現年36歲的Adia出生富裕家庭，父母早年於上環經營兩間珠寶首飾店，持有西半山物業，惟受累於九七年亞洲金融風暴，雙親投資失利，家道中落，最後欠債逾3,000萬元。

贏完輸番學曉管理

結果，舉家搬往加拿大重新開始，他當時要半工讀，在多倫多大學修讀電腦及經濟學系，「由家境唔錯變到好差，印象好深刻。當年要租住Basement，寄人籬下，又做好多兼職，好似侍應、工廠工人等。」

他努力賺錢兼自學投資，閱讀逾200本理財投資書，冀透過錢搵錢方式重回富裕生活。○五年時，戶口只有數千元的他回流香港，寄居於婆婆及舅父家，惟生活環境狹窄及骯髒，迫使他設法買樓自住。

「我當時用緊電腦，覺得隻腳好痕，痕吓痕吓痕上大髀，原來有隻曱甴。試過一起身見到床尾隻腳夾死咗隻曱甴！我一路好想搬，諗點可以買到樓。」他向父母借3萬元炒樓。「本來諗住炒樓，後來發現唔夠錢，轉炒股票。又去證券行做投資顧問，月薪僅8,000元，邊做邊炒。」

他提及，初期主力投資商品期貨或期權，首次獲利是透過沽三張咖啡期貨，由3萬元炒至10萬元，之後亦投資紅豆、粟米、黃金等，短時間內用最大槓桿炒賣商品，戶口滾大至56萬元。「當時不停贏，仲要愈炒愈短，但唔夠一年，戶口輸咗一半！○五年尾，沽黃金輸咗28萬元，當時心情好低落。」

受過教訓後，Adia學懂風險管理，同時初踏物業市場。○六年十月，當時僅26歲的他終上車，以10萬元首期，買入紅磡黃埔花園約值168萬元的單位，月供逾8,000元。他在股場上贏多輸少，用兩年時間股票倉位已滾至逾100萬元，並每年買一個物業，包括○七年的荃灣綠楊新邨、○八年的黃埔花園、○九年的沙田中心。單計物業投資，他就獲利逾600萬元。

入市前必參考指標

直至一一年，政府推出壓抑樓市措施，他認為，股票投資回報大於物業投資，故停止買樓，甚至於一二至一三年陸續賣去香港所有物業，轉向美國物業市場。「一三年我預期香港樓市會調整一年，於是轉投美國樓市。一年後，我重回香港樓市，用約100萬元首期買入紅磡海濱南岸自住。」

今年五月，當所有人以為香港樓市將持續回落，他卻認為是短暫見底，以約540萬元首期，買入西貢逸瓏園連天台單位，售價逾3,000萬元，月供近12萬元。他稱，香港樓價走勢要研究多個參考指標，包括負擔比率、供租比率、人口結構等。

「依家買層樓租金回報3.3厘，減按揭利率的1.7厘，加埋香港通脹3.4厘，結果係有正5厘回報。」他認為，樓價整個周期是十五至十八年，由○三年至今尚有數年時間，相信現時是中期見底，之後升勢過後會大跌。「喺樓市冧之前會有瘋狂階段，時間可能好短，半年至一年左右，但升幅會好厲害，所以買埋逸瓏園食埋最後一個升浪。」