絲絲講場：恒生40年舖 老主顧喜迎新
恒生銀行（00011）係香港數一數二嘅老牌錢莊，一九三三年開始已經為港人服務，陪住唔少香港人拚搏成長。唔講唔知，恒生喺灣仔莊士敦道間分行原來亦由一九七七年開始運作，計落足足服務咗我哋40年，係唔少灣仔區市民嘅集體回憶。
翻新面積增倍
之不過，灣仔區今時唔同往日，區內對銀行服務嘅需求加大，所以恒生莊士敦道分行都要進行翻新，先可以繼續服務。依家莊士敦道間分行，總面積由8,000方呎倍增到16,000方呎，係繼中環總行，恒生港島區最大嘅分行。
雖然莊士敦道分行翻新完，外貌唔同晒，但陣陣濃厚嘅人情味仍然Keep到，尋日分行開幕禮，恒生仲特登請番七七年就喺恒生開戶嘅長情客戶撐場，又送贈「真‧金財神」擺設，祝福客戶財源滾滾，而當年主持人就正正係恒生銀行三位元老－－何善衡、何添和利國偉。
區內美食奉客
開幕典禮除咗舞龍舞獅，當然唔少得奉上茶點招呼賓客，恒生就好窩心咁係灣仔區搜羅咗唔少中西美食宴客，包括國際咖喱館嘅串燒沙嗲及咖喱角、快樂餅店嘅蛋撻、龍皇酒家嘅點心同祺棧茶行嘅中國茶等等，真係聽到都流晒口水。恒生銀行副董事長兼行政總裁李慧敏就話，希望依個安排可以代表到灣仔社區，新舊共融同埋中西文化薈萃！
余絲韻