絲絲講場：上市紀念品永勝出「掌」贏晒
尋日五隻新股齊齊掛牌，一睇送咩紀念品畀港交所（00388）已經高下立見，絲絲決定亦頒番個獎畀啲公司。
機械掌至佳勞作
識送梗係送自己公司產品，醫療器械生產商永勝醫療（01612）送嘅機械手捧住個呼吸儀器模型，隻機械手係用嚟幫助中風病人康復用。呢隻機械「如來神掌」，論心思論造型論精緻度，「勞作大獎」實至名歸。
至於SD-WAN路由器供應商珩灣科技（01523），就送番Router。嗯，見紀念品如見公司，得「最正路獎」。
無煙煤生產商中國優質能源（01573）送嘅「紫袍玉帶石雕牛」，同埋海底撈火鍋調味料供應商頤海國際（01579）送嘅「琉璃火鼎」，呢類雕刻裝飾見慣見熟，齊得「最常見獎」。
五企打鑼要人提水
仲有最後嘅「最普通獎」，非星星地產（01560）莫屬。佢哋送個亞加力證書架，印住公司名、股份代號同掛牌日期。同絲絲中學時啲感謝狀有得揮！
尋日朝仲有蝦碌位。五間公司老闆員工嘉賓塞滿港交所幾咁熱鬧，全場齊嗌「5、4、3、2、1」倒數敲鑼，點知嗌完「1」之後竟然冇鑼聲！要主持人提水嗌「敲」，五位老闆先識好斯文咁敲響開市鑼！
余絲韻