隔晚美股做好，帶動昨日港股又再重上21,000點樓上，主板成交710億元，氣氛似乎比想像中好。不過，正當大家都聚焦英國公投事件，南海局勢似乎又再升溫，到底會唔會係繼英國公投後金融市場另一隻黑天鵝？反正如今唔係咩大時代，短炒宜嚴控注碼，下半年地緣政治風險因素不可不察。一旦南海擦槍走火，金價又會借勢發圍，所以金礦股只能順勢，唔好估頂！
繼旅遊產業央企重組消息後，能源及電訊央企亦出現高層人士任命，看來國企改革正加速推進。昨日提及的香港中旅（00308），最高見過2.5元，收報2.46元，升7.42%，成交2.42億元。
繼續睇睇國企改革概念股，早喺前年七月，六家央企被國資委選為第一批改革試點企業，包括中糧集團及中國醫藥集團等，而在港上市的有中糧系公司同國藥控股（01099）等。國藥去年一度熱炒，可惜救市一役，呢批概念股股價重回起步點。
不過，見到國藥自首季再試去年低位支持後，反覆回升，上周更一度直闖去年高位，其勢大勇。
反觀中糧系兩隻主將──中國食品（00506）及中糧控股（00606），股價雖已較今年首季低位回升，但幅度不大。見到中糧昨日重上250日線，收報2.77元，升3.7%；相對而言，同系中食表現則較落後，昨日收報2.73元，與250日線3.27元尚有一段距離。
到底下半年國企改革概念股翻炒成唔成氣候，還要看大圍氣氛，只是見到近期連煤炭股都步離谷底，照計呢類股不乏翻炒條件。中食短線若能企穩50日線2.69元樓上，目標反覆向上挑戰3至3.2元阻力區，失守2.45元止蝕。
司慕渢