絲絲講場：港姐老婆做執董利駿CEO預喜

少奶奶才貌雙全

尋日新股利駿（08360）首日掛牌，前港姐胡家惠（Cathy）就以利駿執董身份出席上市儀式。Cathy係○二年港姐季軍，嗰屆冠、亞軍咪就係林敏俐與左慧琪囉（唔知呢兩位依家去咗邊呢）。

查實，Cathy亦係老闆娘，事關佢老公邱仲平（Allen）就係利駿大股東兼CEO。間公司由Allen與另一位董事施潔喺十幾年前共同創辦，Cathy舊年加入利駿，現時除咗係執董外，亦係公司媒體與公共關係總監，睇嚟唔止係少奶奶。

佗BB女5個月

不過，問到佢進身上市公司高層有咩感想，佢話除咗開心，就係覺得老公好叻，Woo～佢仲摸住隆起嘅肚話自己有咗五個半月，係囡囡！恭喜晒！

佢仲有個三歲大女Charlotte，尋日雖然無嚟睇爸爸嘅事業王國上市，但就會去慶功宴。Cathy話大女唔會怯場，怕佢興奮得滯添。

絲絲位麻甩老頂問，點叫嫁得好？做美魔女定做佗B上市公司執董好？絲絲未做過港姐，唔曉喎。

余絲韻