絲絲講場：高達都救唔番！智傲累挫84%

本地Online Game及手遊開發商智傲控股（08282）周一發盈警之後，過去兩日都被人洗倉，前日更加大跌近七成。唔知係唔係為咗救一救個跌勢，智傲尋日出動機動戰士高達救亡。

智傲公布與上海久游網絡科合作，攞到Bandai嘅《機動戰士高達Online》港澳台經銷權，預計今年第三季登場。隻Game聽落好似好吸引，又有阿寶又有馬沙咁，分分鐘有得重演RX-78-2大戰紅彗星。

不過，個消息尋日公布咗之後，智傲嘅股價竟然再插14.29%，收市得番1.2元，較上市以來最高收報價7.65元，大插84%。嗯……睇嚟呢鋪真係連高達都救唔到，唔通真係要搞番個「超級機械人嘉年華」，搵埋鐵甲萬能俠、新世紀福音戰士先得？

想追入？計絲絲話，都係睇定啲好，否則到時唔止高達，要勞煩埋阿寶出嚟同大家講句「人類總要重複同樣的錯誤」就唔好啦。

余絲韻