絲絲講場：亞積邦CEO呻冇做明星
亞積邦租賃（01496）CEO劉邦成雖贏在起跑線，亦一樣有遺憾，佢嘅理想其實係做星。
「登6」在即想出書
話說尋日亞積邦租賃CEO劉邦成傾開，忽然問大家有咩理想！跟住仲自爆當年因着爸爸而好理所當然咁開始呢盤生意，但其實佢自己有另外一個理想，就係想做Star（明星）！聽過佢唱歌堅好聽，幾個月前仲喺公司上市慶祝晚宴上大展過歌喉添。
愈講，劉邦成仲愈感慨，話自己就快「登6」（快60歲），開始諗用十年八載去準備退休安排。佢話最想係出本書，講吓自己咁多年嘅心路歷程。
查實，劉邦成位公子劉子鋒依家係公司副總裁，話唔定好快可以接棒，到時阿爸劉邦成就多啲時間去「追夢」喇。不過，劉公子會唔會同阿爸一樣，其實有另一個理想呢可。
余絲韻