絲絲講場：財仔Cold Call玩謝股佬

近期有唔少券商投訴，話經常收到不明來歷嘅財務中介人致電營銷。金融市場一向分秒必爭，遇上波動市緊張到咩時，仲要聽埋呢啲Cold Call，券商簡直激到彈起。

有證券行負責人就同絲絲講，上周得嗰四日市，但就連續三日收到同一個財務中介人嘅Cold Call，加埋呢排佢哋因為英國公投脫歐單嘢，已經忙到甩轆，所以唔激氣就假咁話。

或由持牌紀錄攞料

券商仲話，啲財務中介人好可能係從證監會持牌人公眾紀錄冊度，取得券商電話與負責人名字。點解咁估？事關啲財務中介人唔係打去總機或負責人直線，而係打咗畀證券行投訴主任，搵某啲負責人。證監會持牌人紀錄冊提供嘅，就係投訴主任嘅電話！

券商質疑，持牌人紀錄冊原本係畀公眾人士查閱啲經紀是否持牌，同埋可以做得啲咩受規管活動；但依家啲資料就畀啲財務中介人，甚至係獵頭公司利用，證監會應該要正視。

行家呻被踐踏私隱

佢哋仲呻話，證監會個紀錄冊入面，連持牌人過去多年嘅持牌紀錄資料都有，質疑仲有冇需要，「啲客都係想知今日我係唔係持牌人，我十幾年前嘅紀錄仍在，係咪仲有實際用途？覺得個人私隱資料有被踐踏之嫌，亦會畀某啲人用嚟建立持牌人資料庫！」睇嚟，證監會係咪要做吓嘢呢呵。

余絲韻