創意新勢力：港產手遊商 玩出2億升呢

6waves開發或代理的遊戲《逐鹿三國》、《123猜猜猜》、《義氣仔女Online》、《開心農場》，大家未玩過都可能聽過。6waves成立以來累計融資額為3,250萬美元（約2.53億港元），Arthur豈非進身億元公司老闆之列？

首三月已收支平衡

「我冇咁諗喎，啲錢都係擺番公司，反而壓力、擔心和責任都大咗，因唔再係紙上談兵，真係要用錢發展，要諗如何畀投資者好嘅回報。我哋完全冇嗰種億元富豪嘅感覺，而係要繼續埋頭苦幹努力。」

七十後港人Arthur讀工商管理出身，畢業後在銀行界工作七年，但自小熱愛科技的他，適逢遇上雅虎在港開設分公司，遂把握機會轉行，一做又七年，並在雅虎認識了幾個志同道合的「香港仔」，燃起一同創業的念頭。其後fb對外開放平台，他們就嘗試在平台上推一些應用測試市場反應。

「創立6waves時，我們4個人畀咗個目標自己，只預留約五個月營運資金，若五個月都做唔到啲嘢，冇收入，就搵番工做。我們定嘅時間確實比較進取，但有時有啲嘢係逼出來。」他憶述。

結果公司創立三個月已收支平衡，首年收入全部靠廣告，其後因發現很多人愛玩fb遊戲，於是全力在這方面發展，《開心農場》就是他們代理的其中一隻fb遊戲。

中年創業「唔熟唔做」

「創業初期既辛苦又難忘的經歷之一，是代理《開心農場》時，冇諗過咁多人玩，伺服器有一晚突然冧咗，要三更半夜起身補救，希望盡快恢復玩家數據。有失誤捱罵係必定，但這亦證明玩家緊張遊戲，關鍵係我們要從失敗中學習，不再犯同類錯誤。」

Arthur指：「正如我在RISE科技會議上分享，創業難，所以你要盡量令變數愈少愈好，要揀自己熟悉嘅市場、產品去做，要揀你喜歡嘅事情去做，亦要了解自己及產品獨特嘅地方，現時市場有的，但你可做得更好；現時市場未有的，當有咗之後，大家會接受。之後，你要睇自己有冇足夠條件實行，若不能就要加多幾個創辦人一齊做。建立團隊後，要埋頭苦幹，有信心去做出來，不要輕易放棄。」

他補充，創業無分年齡，他自己也是30歲後才創業，故就算是中年人，有夢想意念，都可嘗試創業。

談及行業發展，6waves也跟着用戶走，由fb遊戲轉至專注手機遊戲，一三年推出其第一隻手機遊戲《123猜猜猜》，Arthur笑言：「好多人玩，不過冇乜人畀錢，但呢個係學習過程，幫助我們其後喺代理《逐鹿三國》上嘅成功。」

留低用戶 成功關鍵

《逐鹿三國》去年推出時，常處香港區營收榜首五位，在日本更曾打入頭20大。用戶留存率相對高，下載遊戲30日後，約有25%用戶會留低，行業平均僅約10%。

Arthur指：「遊戲行業競爭大，因最賺錢，但諗吸錢前，要先諗如何留低用戶。除遊戲設計等吸引，平衡性亦重要，就算玩家唔畀錢，只要肯花時間去玩，都有機會勝過付費用戶，而不是花錢嘅就贏晒。」他亦會讓八歲的兒子玩部分遊戲，因若小朋友都可以好快上手，反映遊戲在新手入門設計上做得出色。