絲絲講場：iBond 6年6樣估佢唔到

第一驚：成交額歷來最高

iBond 6尋日於港交所（00388）交易平台收市報103.35元，不計手續費每手帳賺335元，唔少人尋日首掛就沽出iBond 6賺幾百蚊茶錢，尋日成交額高達18.04億元，係六年以來最高！意味啲咩？咪係大家寧願即食兩年息先囉！

第二驚：老婆OT 老公心痛投訴

大家抽iBond抽得興起，銀行職員忙到癲，據說喺iBond推出初期，有署名「憂心忡忡的丈夫」嘅市民寫信向金管局投訴，話做銀行嘅太太為準備iBond而開OT。結果？金管局一位高層親自回信安撫呢位「愛妻號」。算係咁！

第三驚：海報的神秘電梯

每次iBond啲宣傳海報都有條上行嘅「神秘電梯」出現，條電梯到底有咩寓意？絲絲仲未拆解到，估係步步高陞啩。

第四驚：肉眼翻Check申請表

iBond向來唔接受重複認購，金管局除咗用「自家製」電腦程式確保冇人重複入飛外，原來當初首次發行嗰陣，仲派咗三十幾位同事用「肉眼」再檢查一次！嗰年有超過15萬份表格，即係每人要睇超過5,000份！唔知道之後嘅幾年都有超過60萬份申請，呢個「肉眼翻Check」仲有冇沿用至今呢？

第五驚：「派啤牌」方式邊個發明

iBond分派模式好特別，先向每位認購者派第一手，餘下手數足夠嘅話，就會向認購兩手或以上嘅人派第二手，如此類推，直到餘下手數唔夠「派啤牌」畀每一位投資者，就會以抽籤形式配發。呢個「派啤牌」方式據說係金管局一位高人發明。邊位高人咁鍾意玩啤牌？你估吓。

第六驚：個名係抄考返嚟？

以為個名「iBond」係抄考「iPhone」？想潮啲？No啦！iBond只係inflation-linked retail bond（通脹掛鈎債券）嘅縮寫。（照計呢樣大家應該知，但如果你唔知，驚奇嗰個係絲絲囉）

余絲韻