英國留歐聲音略升，恒指昨日乾挾340點，電能（00006）及長建（01038）升3至4%，滙控（00005）升逾3%，渣打（02888）更急升近8%。
不過，呢啲大事件前夕，冇十足把握都冇謂博，從交投可見，大部分投資者都選擇按兵不動，靜候公投結果。
昨日傳來第二批國企改革試點名單或會於近期公布，但與去年大時代不同，如今這個消息並未見得能在股海泛起漣漪，真是此一時、彼一時也。事實上，首批國企改革試點企業公布至今，並不見得在重組上有太大的進展，股價亦未見得能跑贏大市。有了這個經驗，市場對炒作第二批名單未存任何憧憬，反應冷淡，亦不無道理。
在市況飄搖之時，仍留喺魚缸的資金，只有揀選強勢股停泊，勝在可攻可守。第二季表現亮麗的藍籌股，一定唔少得騰訊（00700），股價一度創下歷史新高178.5元，近周隨大市調整回試170元邊承接。
今年餘下時間，騰訊會繼續反覆創新高，每次調整都可睇位分注吸納作中長線持有，就如本周外圍市況再掀波動，騰訊股價再試168至170元水平支持，可睇位買一注，下一個重要支持在163元。
至於目標價，既屬強勢順勢持有無謂估頂，反正表現料可跑贏大市，下行風險亦唔算大，在如此淡靜市，已算係難得的值博之選。
司慕渢