絲絲講場：馬雲呻一生最錯創阿里
阿里巴巴創始人馬雲近排金句一句接一句，繼上次「假貨比真貨更好」之後，佢直頭變身「金句王」，剛剛就喺俄羅斯聖彼得堡國際經濟論壇上又有新金句：「我呢一世人最大嘅錯誤，就係創建咗阿里巴巴！」
假貨受查連環困擾
一間喺美國上市嘅中國科網巨企嘅揸Fit人，做乜咁大感慨呀？如果呢句說話係認真嘅，就真係一句好「甘」嘅金句囉！不過，絲絲心諗，阿里巴巴今時今日有咁嘅成績，理應開心都嚟唔切。莫非馬雲因為近排畀美國證交會調查去年「雙十一」近一千億元人民幣交易嘅會計核算方式有否違反聯邦證券法，以及無時無刻被指罵淘寶賣假貨等事情困擾，一時搞到意興闌珊啫？
聽佢親自解畫，原來係咁：「為咗阿里巴巴，我嘅所有時間幾乎都放咗喺工作上。我沒料到創建阿里巴巴會改變我嘅一生，我本來只是想成立一家小公司，然而它卻變成了這麼大嘅企業！」
如有來生 遠離工作
唉，明白嘅，「人在漿糊」，真係身不由己。之不過，馬雲呢趟真係好大感慨，佢仲話，「如果有來生，希望可以去一個平靜，遠離工作嘅地方，喺嗰度平平靜靜度日！」
係就係嘅，之不過，世界邊有咁多「如果」呢？
余絲韻