絲絲講場：唔係啩？25歲至知老竇係股神？

以為阿爸係窮「錫Q」

現實係，世界上第三最有錢嗰位巴菲特，佢細仔Peter到25歲先知老竇原來係股神、先發覺屋企原來好有錢！

Peter親口話，家姐小學時填家長職業寫「Security Analysis」，佢以為阿爸係做保安，負責Check啲警鐘系統！佢話佢哋三姊弟細個嗰時真係唔知阿爸係做乜，亦都唔覺屋企有錢，佢細細個讀公立學校兼行路返學，連英文老師都係媽咪以前嗰個。

其實唔怪得Peter，事關佢老竇巴菲特出名樸素，雖然現時身家有608億美元（即是4,742億港元），但巴菲特仲係住緊N年前用3.15萬美元（約24萬港元）買落嗰間奧馬哈市嘅舊屋，Peter就喺呢間屋大，佢仲爆話「間屋依家啲擺設同1965年一樣」！

唔接衣鉢寧玩音樂

至於阿仔Peter，亦絕對唔係你想像中嘅富二代，佢係作曲家、音樂家兼作家，佢為紀錄片《500 Nations》製作嘅配樂之前仲攞過艾美獎添。See！家教幾重要！

余絲韻