Market Insight：BB股趁調整上車

A股第三次畀大摩請食閉門羹，內地金融圈自不是味兒，中證監「沒有中國A股的國際指數並不完整」，真係隔個mon都聞酸葡萄味。無疑A股恨入MSCI恨到發燒，加QFII額度，一陣又滬港通，做到加零一大摩依舊唔賣帳，講到底咪又係一班追住MSCI指數，賭緊大錢的外資基金唔想咁快放A股入嚟。

舊年阿爺搞得出一隻A股政策牛，就以為上下其手無所不能，諗住冷卻市況，唔好畀班鬼佬以高估值拒絕入摩藉口，結果點大家至清楚，規管兩融搞出大頭佛，個市插水至今未救得番。自此一五年入唔到，一六年只會更難。

凡事離唔開個「利」字

過去一年A股走勢無段好睇，滬港通大部分時間買賣兩閒，經歷股災、查沽空、粗暴救市之後，外資見過鬼怕黑，對A股無晒胃口，事實擺在眼前係，外資早有重倉，比A股折讓閒閒哋兩至三成的H股，一池死水自故自沉淪。

照古勝話事偈，金融市場從來見高拜見低踩，今日中國經濟、股市處弱勢，求人擺錢入嚟自是難比登天。但不要忘記，一切離唔開個「利」字，外資揸重貨的H股，估值每況愈下無人吼，班鬼佬睇見自然唔想隔多重，走入大陸同班A股大媽癲。

回帶睇番，最錯係將托市兩萬億元人仔彈藥掉落A股。若國家隊係入市買H股，推到H貴過A，有平貨底的外資當然唔介意入場撐A，無貨底的都會追返折讓的A股，成件事就唔會似今日向住愈玩愈縮的方向發展。講到底就係驚要蝕頭注畀外資，總之H股一日唔炒，想引鬼佬落疊好難。

好孩子似係跌過龍

昨日同嬰兒產品有關的股份兩邊走，賣兒童保健品的衍生集團（06893）連升多日，昨日再升逾7%破頂，收報2.4元，而賣BB床、BB車的好孩子（01086）就跌逾7%，報3.58元。好孩子周二已大跌19%，有指是與集團下調業績指引及主要股東連日減持有關，大和就認為市場反應過大，股價大跌亦為長線投資者帶嚟買入機會。該股已接近三月底以大陽燭上升前水平，業務本身唔差，趁調整可留意。

衍生將於二十八日公布去年度業績，早前已發盈喜，上周開始急升，對業績的預期或大部分已反映在股價之上，短炒業績咪貪心。

古勝