點解投資成日損手？梗有理由嘅。朋友可能冇眼睇，最近索性送本書《A Wealth of Common Sense》畀成日受傷嘅絲絲，係財富管理公司Ritholtz Wealth 嘅Ben Carlson所寫。
Carlson話，出色投資者唔係每次都贏，話自己戰無不勝嗰啲一定係呃人。佢話盡量減少錯誤增加勝算，先係出色嘅投資者。以下7個投資慣性錯誤，你有冇份？
好多人將股市當賭場，但又唔認自己係賭徒。如是者，一次又一次短炒，一次又一次唔認輸。戒短炒、棄貼士，否則唔算投資，只係賭。
諗番你試過幾多次「估底」或「估頂」，之後後悔。
史上每一次金融泡沫都係由羊群引起，當羊群睇錯市時，後果災難性。
炒地緣政治事件？炒國策？消息可以極速炒完，唔好受消息誘惑，你未必夠佢快。
一聽到消息就撲入市，唔記得晒風險？緊記要理智分配資產，咪孤注一擲，量力而為。
好多人出事就因為「股神」上身，自以為與眾不同。投資前，要有心理準備「學輸」，咁先會變得謹慎。
過分相信自己對前景嘅分析，乃投資大忌。你大概唔係「神」，無可能每方面都咁獨到，虛心搜集意見先係王道。
余絲韻