絲絲講場：冠君CEO過招繼任人

搞商場要夠歡樂兼夠潮

第1個係「歡樂指數」。李澄明話逛商場最緊要開心，所以爆谷、雪糕呢啲令人想起就開心嘅店舖，一定要有。

第2個錦囊係「Adrian Lee能買到嘢嘅店舖都要Out」。Adrian Lee，李澄明是也。佢話自己65歲，如果啲嘢啱佢買，間舖明顯唔夠潮。

其實仲有多半個錦囊，就係「乜人都Cut得，但絕唔可以Cut洗手間清潔工」。就算一一年香港實施最低工資時，佢都堅持唔減清潔工嘅人手，結果事實證明，洗手間乾淨對商場吸人流好重要。

度名有避忌 搵埋風水師

講開冠君產託嘅中環花旗銀行廣場，今個月月底完成提升工程之後會改名為「花園道三號」。

原來佢哋為諗新名，搵過風水師畀意見，可惜其他名聽落似樓盤多過商廈，終於揀咗依家個名。李澄明仲話考慮過東、西座叫法，但怕聯想到「歸西」，結果冇用到。

余絲韻