孖妹S檔案：齋睇名包你「股」佢唔到

仁：散戶 阿仁、賢：散戶 阿賢

中國北大荒（00039）：霸氣賣酒綠色食品

彩兒：有啲股份名係非常有氣勢嘅，中國北大荒（00039）簡直係粗獷到唔知佢做乜，我淨係諗起饑荒咋，哈哈。

仁：呢隻我記得佢，個名一睇就聯想到係中國北面嘅地方，佢係做糧油食品嘅。

散戶阿仁識讀「朸濬」，認真叻仔！

散戶阿賢夠醒目，估啱「呷哺呷哺」係日文譯音。

Kitty：你咁有信心？睇番年報，佢都算係百足咁多爪，有成幾瓣業務，包括酒類銷售及分銷、綠色食品銷售、物流倉儲等業務。

朸濬國際（01355）：搞酒店要財更要才

Kitty：我自問都算係魚缸才女，竟然唔識讀隻股份名──朸濬國際（01355），好冇面！

仁：係咪讀「力進」啊？好彩我有friend叫阿濬，所以識得讀，業務真係冇研究，係咪做物流o架？我見佢「朸濬」當中有木又有水，但兩個字係乜意思都唔知，哈哈！另外，之前喺二十大升幅榜見過呢隻，係咪細價股嚟o架？

彩兒：你果然係才子，讀啱喎……佢係隻毫子股，但就唔係做物流，佢喺內地搞經濟型酒店，包括悅來客棧，同埋提供酒店顧問及管理服務，上月下旬發咗盈警，似乎客棧生意麻麻哋喎。

川控股（01420）：星洲最「辣」建築商

彩兒：上星期先上市嘅川控股（01420），令我聯想起四川麻辣火鍋，諗起都冒汗啊，不過睇真啲，原來佢完全唔關四川事囉……

仁：我有留意呢隻，印象中係做工程嘅，但詳細資料就唔知喇。

Kitty：佢喺新加坡做土木工程起樓o架，係當地第四大建築商，公開發售超購逾500倍o架，彩兒真係有眼不識泰山﹗不過，超購咁多掛牌首日竟然一度潛水，好彩到收市都浮番上水面，第二日仲炒高添！

卜蜂蓮花（00121）：吸大媽優雅行超市

Kitty：卜蜂蓮花（00121）個名幾咁優雅，係咪賣衫嘅呢？彩兒，不如我哋去實地視察。

賢：嘩，我未聽過個公司名添，「蓮花」，係咪做女性化生意，例如零售呢？真係估唔到做乜業務。

彩兒：個名咁Lady，你又點估到佢係做大媽生意呢？佢主業係喺內地經營超市同便利店，睇番一五年年報，門市據點主要喺廣東，其次係上海，公司上星期又出咗盈警，似乎內地經濟放緩，搞到舊經濟行業全部都難撈。

Kitty：超市股啊？都唔啱我形象嘅！

呷哺呷哺（00520）：內地最「可愛」火鍋

彩兒：呷哺呷哺（00520）唔止個名可愛，連冧巴都可愛過人，普通話諧音「我愛你」喎。

賢：呢隻我冇炒過，個名似譯音，係咪類似「Shabu Shabu」呢，一定係內地公司嚟，一睇個名就知唔係香港公司！

Kitty：阿賢你真醒目，佢公司本身係普通話讀音，類似日式火鍋嘅Shabu Shabu，廣東話係讀「頰步頰步」嘛，截至舊年底，佢有552間餐廳，做快速休閒火鍋嘅，主力係北京地區，業績都唔錯，賺到2.63億元人民幣，按年升超過八成。

時間由你（01327）：一條龍製造兼賣錶

彩兒：時間由你（01327）呢個公司名真係夠晒性格，其實你又知唔知佢做乜o架呢？

賢：呢間公司個名我有印象，我覺得係同錶有關係，因為個Style有啲似時間廊旗下嘅鐵達時啊！

Kitty：佢有兩條主要業務線，包括為OEM客戶做設計、生產及組裝手錶，同埋用時間由你、榮凱同埋副品牌Color設計、製造同埋銷售手錶。

天福（06868）：飲茶飲到去電商界

Kitty：平時收市之後，我最鍾意就係去品茗，唔單止紓緩到睇市嘅緊張心情，仲可以扮文青添！為食嗰陣我間中都會幫襯天福（06868）旗下喫茶趣TO GO嘅珍珠奶茶，原來唔少股友都唔知天仁茗茶係天福旗下o架。

彩兒：你哋睇吓天福創辦人之一李瑞河已經80歲都仲咁生猛，就知飲茶養生啦，Kitty記得飲多啲，抗氧化啊。

賢：佢嘅珍珠奶茶我都飲唔少……其實天福近年有新搞作，公司一三年收購廈門天鈺商貿，一直想擴大互聯網銷售業務，希望搞電商同直銷平台，呢類業務喺內地有商機，未來或者可以喺電商行業分一杯羹。不過，我覺得佢未係時機炒上，始終都十劃都未有一撇。

密改公司名氹大媽炒

內地股市出名大媽散戶多，為討大媽歡心，部分公司各出奇謀，好多都改名換姓，有啲公司改名頻密程度甚至引起上交所注意，仲發文要求公司披露係咪從事相關業務添。

為「轉型」作「古仔」

內地股民最愛炒「故事」，近年最愛題材包括科網、環保、大健康等，「智慧」、「健康」、「科技」等成為公司改名熱選，令齋聽冧巴或股份名嘅大媽容易上釣，一心以為公司轉型。

今年A股改名嘅例子包括，零七股份改名做全新好（000007.SZ）、蓮花味精改做蓮花健康（600186.SH）、三川股份改做三川智慧（300066.SZ）等……嘩，孖妹真心奉勸想炒A股嘅股友真係要帶眼「識股」啊！

若有料報畀彩兒同Kitty或有嘢問，可電郵money.biz@on.cc

彩兒、Kitty