Market Insight：黃金ETF避險首選

周末民調顯示支持英國脫歐的，有拋離留歐之勢，媒體中也愈來愈多關於一旦脫歐，會導致歐盟解體及英國經濟動盪的靠嚇言論。姑勿論結果係點，經濟同敍利亞難民問題，經已搞到歐盟一頭煙，上周經合組織（OECD）警告，話歐元區通脹達唔到預期般回升，歐洲央行有責任進一步推更多寬鬆政策，講法形同打咗誓神劈願，話現有六招同負利率已經足夠應付歐洲經濟狀況的行長德拉吉一大巴。

上周五歐股率先為英國脫歐的可能作出風險評級，德股重挫2.5%、法股跌2.2%、英股跌1.8%，美股亦受牽連偏軟，科技股為主的納指跌1.2%，港股夜期則跌152點，星洲場外港股落到20,860點附近，偷步跌穿10日線，看來今浪挾淡好大機會已結束。

美經濟復甦漸失速

美國五月非農數據差到極，上周十年期美債孳息輾轉跌穿近一季的1.7厘頸線，落到去1.64厘，六月加唔到息已成定局。當前形勢，更令人擔心是經過三輪QE，美國經濟復甦漸已走到盡頭，印出來的虛假繁榮也即將捨我們而去，地球村經濟失去最後一輛動力火車。

經過呢幾年大規模實驗，市場對央行信任度每況愈下，反觀黃金再次金光閃閃，逼近1,280美元水平。

金價強勢，是對一紙貨幣的存富能力漸起懷疑之舉。事實上，經歷四年調整的金價漸有見底迹象，當個個以為美國利率有正常化的一日，預期落空機會愈來愈大之際，今年喺投資組合加番多少黃金成分，應該無個錯事，等到市場炒QE4就已經太遲。

若嫌實金儲存麻煩，近排金礦股又唔係隻隻跟得貼金價走，可以睇吓香港仲有隻掛牌的黃金ETF（02840）可以揀。

揀傳統高息股穩陣

債息縮緊，好息之徒四出搵嘢買，REITs及公用股升咗一排，再提醒大家，買收息股唔好單睇報價表個息率高低，要知上市公司今年派到息，唔代表明年後年都可以，業績及現金流轉差，又或需要保留更多現金度過行業周期，都可能影響高息股派息能力，尤其屬散戶至愛，睇落高息的內銀股正正屬於這一類。

隨着不良貸款增加，未來盈利及派息能力可能會受影響，如唔識分辨，都係搵番公用股，像中電（00002）及長建（01038）或一眾本地REITs，如置富產託（00778）或陽光房產（00435）一類，避免揀錯高息股，貪息蝕價就唔抵。

古勝