絲絲講場：與小加對話 一千蚊有找
同股神巴菲特食餐晏面對面交流吓，無番千零萬都唔使諗（若然你錢多，不妨去eBay撞手神，個股神慈善午餐仲Bid緊），咁同港交所（00388）行政總裁李小加直接交流呢？平好多，一千蚊有找！
LME年會設網上互動
話說倫敦金屬交易所（LME）亞洲年會下周二（14號）開鑼，當日下午有個「與CEO對話」環節，參加者可直接同李小加交流。今年大會仲「賣大包」，增設下午時段優惠飛半價，每位正價千七蚊，半價就850蚊。一千蚊都唔使，就有可能同小加總裁擦出火花，抵唔抵？你話呢。
聽聞大會安排現場觀眾可以即時用手機或平板電腦，到指定網站與小加對話；鍾意開聲嘅，又可以即場向小加發問，總之，你問得出，佢就答。小加總裁向來乜都敢講，絲絲等睇。
余絲韻