絲絲講場：富人投資贏在起跑線?

首先係，有錢人知得比人多，皆因有錢買資訊，甚麼大行報告唾手可得，多好多數據分析大市，校啱時機入到筍貨。

有錢易掌握資訊

想知得多識得多，除咗買，仲可以學，不過呢樣有錢人一樣贏。你冇父幹，日日忙為兩餐奔波，邊得咁多時間咁多機會學投資，連自己唔識啲咩都仲未知，問得到個冧把人買我買算係咁。

結果愈有錢愈掌握到更多資訊嗰啲，愈可以擸晒最有價值嘅資產，再錢搵錢，幾何級數咁賺；絲絲呢啲只有內心富有嘅，只能攞到市場上剩低嘅餅碎。

原來贏在起跑線係真嘅，除咗葡萄，仲可以點。絲絲唔認命，即問資產管理專家。

「資訊優勢係有嘅，特別依家係資訊世代，咩都要快，就係嗰幾秒出擊，過咗就冇」，連晉裕環球資深管理投資研究部總監林偉雄都咁講！

心理質素成關鍵

不過咁，佢話投資好睇心理質素。普通人多數一係「以小博大、搵快錢」，一係就覺得錢唔多而「戰戰兢兢咁投資，結果影響表現」；有錢人冇錢嘅壓力就「呢度輸50萬，嗰度輸30萬，輸得起就是但」。

講到底，佢話無論有錢冇錢，都要睇佢係負責任嘅投資者，定係唔理智嘅投資者，「呢方面大家都係由零開始，要靠自己努力」。就算資訊與資金方面有錢人有優勢，但大家只要喺投資心理質素工夫，唔難追回失地。所以，內心富有嘅絲絲，冇輸過！

余絲韻