今日係兩地股市端午節假期休市前交易日，市場憧憬今日兩地或會宣布深港通。之不過，在月中MSCI研究納A股入系列指數之前，官媒率先發評論話入唔到都唔係咩大不了，着大家不必急躁，就當係鞭策，要做好各項基礎工作咁話，好似開定後門打定輸數咁款，咁深港通會唔會再拖吓先，就不得而知了。
恒指唔經唔覺上番21,300點水平，國指亦剛重上9,000點關，但14日RSI上番接近70，照計若然睇淡下半個月走勢，可以開始小注試開淡倉。
板塊方面，昨日留意到燃氣股有異動。中國燃氣（00384）上升4.09%、華潤燃氣（01193）上升6.05%、新奧能源（02688）則升5%。
查實呢個板塊已靜咗好耐，睇好後市可以博追落後，睇淡後市的就可以趁升勢尚未逆轉博呢類落後板塊輸家食尾胡。
論實力，其實潤燃可視為首選，只是昨日支陽燭大就係大，但成交未算配合；新奧股價相對落後，但睇圖40至41元阻力非輕；至於中燃，股價剛重上牛熊分界線，短線可先觀望250日線11.4元的承接，守穩其上，而10日線又抽穿50日線的話，是浪目標向四月高位12.62元推進。
司慕渢