Market Insight：體品股炒上有難度

六月份三大事件有新變化，耶倫周一發表演說再冇提加息時間表，大有縮沙之意；A股入MSCI本來機會話升至七、八成，但當日不設記者會，傳聞又有變數；至於英國脫歐公投至今民調仍係五五波，成為最不明朗因素。不過，古勝仍認為英國人屬於保守兼現實派，所以股市近期視之為機會多於風險，標指隨時在公投之後創新高。

A股自五月最後一個交易日一挾之後，至今又回復死蛇爛鱔格局，今日將公布外貿數據，呢個數據一向最難估，但卻不能過分睇死。恒指有機會挑戰21,634點之阻力位，騰訊（00700）經已接連創下新高，昨日輪到中移（00941）接力，可能下隻到滙控（00005）。

中資搞波恃住錢多

蘇寧買入國際米蘭控制性股權引來議論紛紛，另一間AC米蘭亦傳聞落入中資財團之手。中資近年對於買球會相當積極，先後買起西甲愛斯賓奴和來季降落英冠之阿士東維拉控制權，另入股西甲馬德里體育會和英超曼城。

以前買歐洲四大聯賽球會是中東及俄羅斯佬之玩意，原因是油錢得來容易，但近年油價大跌，變成中資玩晒，而且不但「走出去」，並以超高薪聘請外援到中超搵食。

中資是否錢多得滯？賣電器又同搞球會有乜關係？搞球會主要靠門票、轉播權、廣告及贊助等收入，如果突然出現一超人氣新星仲可賣走賺錢，但大部分搞波都係求名，就如國米已連年蝕錢，若想重振聲威又要花一大筆買球星。雖然今年爆出一間李斯特城名利雙收，泰籍班主刀仔鋸大樹成功例子，但畢竟只佔極少數。

唔少投資者即時諗起炒體育產業股，因為泡沫可製造繁榮。不過，中國所謂體育產業絕大部分集中在體育用品股身上，而體育服務產業所佔比重極小。體育服務產業包括舉辦賽事、搵廣告贊助、經理人收入等，中國尚未成熟。

香港上市公司有智美體育（01661）負責賽事營運，但集中搞馬拉松及龍舟賽，去年受影視節目廣告代理盈利大跌所拖累，純利大跌逾81%。文化傳信（00343）原計劃反向收購一間英超直播權（中國及澳門區）公司，但在港交所（00388）收緊賣殼條例下未必成事，而且內地球迷似乎對意甲及西甲興趣較大。

內地品牌定位太相近

都係講番體品股，隨着同店銷售及訂貨會增長放緩，此板塊的最風光時候已過。而且就算Nike在美國股價亦由最高65美元跌至54.28美元，估值貨比貨之下亦難免有拖累。體品股唔係唔好，只係品牌太多且市場定位相近，一旦增長開始放緩，有可能觸發減價戰。安踏（02020）早前高調公布進軍足球產品，但足球係睇的人多、踢的人少，只係噱頭居多。

踢波兩隊唔計後備都要22人，都市人生活繁忙好難約齊腳，做運動以買一對跑鞋最方便，近年中國及香港均見長跑大行其道，亦帶動運動鞋銷售直線上升。不過，正如同文黃國英上星期以安踏贊助NBA明星捉鹿不懂脫角的例子，中國商人做品牌始終差一截，長線難以是國際品牌的對手。

古勝