絲絲講場：貼股咁貼高盛估法蘭西捧歐國盃
四年一度嘅國際足球盛事歐洲國家盃（歐國盃）呢個周六（十一日）香港時間凌晨三時就會喺法國巴黎揭幕，大家都開始估邊個國家最終勝出捧盃，國際知名投行高盛亦都唔例外。由高盛經濟師哈哲思（Jan Hatzius）帶領嘅團隊就估今年會由主辦國法國奪冠，機會有23.1%；機會第二高嘅係德國，有19.9%；第三高係上屆盟主西班牙，有13.6%；英格蘭擁躉可能失望啦，皆因高盛估佢只有10.5%機會贏。
世盃估錯 今次「戴頭盔」
到底班經濟師係點估今次嘅賽果呢？佢地收集咗自一九五八年以來4,719場嘅國際足球賽賽果，再將佢哋放入Elo分級系統嘅模型，從而分析每一隊嘅表現。當中更細緻到講埋比賽嘅路線圖，例如英格蘭將會喺最後16強打敗羅馬尼亞，再喺八強入面打敗葡萄牙，之後會喺準決賽入面被西班牙打敗。
不過，唔好咁快信晒佢哋嘅預測，皆因佢哋都曾經做過「燈神」。高盛喺二○一四年巴西主辦嘅世界盃都用過差唔多嘅模型去估賽果，當時就估巴西有48%嘅機會拎冠軍，點知最後巴西喺準決賽以1比7畀德國「血洗」，只係拎第四。今次連佢哋自己估完都戴番個頭盔，話唔係有100%嘅信心會估中，所以我諗大家都係唔好信晒！
葉文炘撐德國做盟主
香港證券界亦有唔少球迷，佢哋又有乜嘢心水呢？大中華投資策略研究學會副會長（港股）李偉傑就看好葡萄牙，「我很鍾意C朗，相信今次他會有發揮，把輸了嘅贏番嚟！」
瑞信香港股票衍生工具銷售及市場推廣經理葉文炘原來都係資深女球迷，佢認為，單係過往只有兩支球隊曾經先贏世界盃，再贏埋其後嘅歐國盃，分別係法國同西班牙，而佢認為今屆德國就有希望成為第三支，因為佢嘅中堅愈來愈成熟、有默契、有策略；球員快速、靈活，這跟投資輪證市場有很大共通點。
余絲韻