北水頭等倉：安踏體育逢高減磅
第八輪中美戰略與經濟對話展開，國家主席習近平發話強調要加強經濟政策協調。事實上，如今全球一體化已發展至一個階段，各主要經濟體牽一髮動全身，而中美兩大國的動向足以影響大局，故近年明顯見到在各項重大財金政策上，雙方都溝通過有晒默契。除非年尾美國由希拉妮出任新總統，相信中美兩國呢個構通模式唔會有太大變化。
中資染指足球事業
繼去年十一月中國星輝集團收購西甲老牌球隊愛斯賓奴股權，以及翌月中國華人文化控股聯手中信資本入股英超曼城的母公司後，蘇寧剛宣布收購意甲國際米蘭約七成股權，睇嚟國際球會被「染紅」個案將陸續有來。
歐洲國家盃快開鑼，在港上市的體育用品股，昨日最省鏡係隻中國動向（03818），股價曾搶高至1.54元，收市急升12%，報1.46元，成交急增。之不過，未見板塊內其他股份有異動，安踏體育（02020）僅升1%，李寧（02331）無升跌，所以都係睇定啲咪心急追貨。
事實上，睇番龍頭股安踏走勢唔多盞鬼，首季走勢已扭轉了過去三、四年的升軌趨勢，上月股價大幅調整，本月初更一度低見15.82元。基金股轉勢影響不用低估，必須重新評估，股價走勢既已由強轉弱，睇怕呢次調整唔會係一兩季可以完成。短線若未能企穩16元樓上，唔排除仲有得跌，有貨宜逢高減持套現。
司慕渢