孖妹S檔案：股評新世代 點「炒」起自己？
炒股難，做股評人可能仲難，要喺芸芸金融界咁多人之中突圍而出，吸引到孖妹呢啲散戶，必定要有啲過人之處。我哋今期搵嚟金融界兩位八十後俊男美女，睇吓新一代嘅股評人究竟要靠咩嘢謀求出路。
譚：富昌金融研究部總監 譚朗蔚
做秀講經 股民易明
彩兒：你做股評人都做得好出位吓喎，最近見你扮乞兒宣傳自己以「五窮六絕七翻身」為主題嘅投資講座，之前又將啲流行曲改歌詞，令佢哋變咗財經歌，仲即席喺你嘅講座唱埋出嚟添。
Kitty：你嗰首改編「好好戀愛」嘅「好好A股」，真係唱出晒我喺上年A股爆煲後嘅心聲呀！
譚：我本身鍾意表現吖嘛，加上我想將我嘅講座變成一個體驗，令人覺得投資係輕鬆嘅事。依家好多人做投資講座，宣傳海報通常都正經，有幅講者嘅相，題目就係第幾季嘅投資展望，咁好悶。我有啲投資講座係收費嘅，所以會花啲心思，令人覺得呢個唔係平時嗰啲講座。
彩兒：咁你呢個股評人係點練成㗎？
譚：我爸爸係個研究風水算命嘅人，啲人成日都想聽佢指點吓迷津，所以佢喺一班人入面經常都係焦點，令我好崇拜佢。
我覺得投資呢門學問嘅受歡迎程度係僅次於風水，任何階層都會有興趣聽，所以令我想成為股評人。做股評人某程度上，滿足到我鍾意做「風頭躉」嘅性格，另外我覺得真係幫到人。
睇十天線判斷強弱
我上一份工喺一間基金公司度做，接觸傳媒嘅機會唔係好多，我就用自己嘅私人時間，喺網上分享投資心得，累積粉絲，並喺一四年做第一場講座，嗰時有40個人嚟，做到第六次，有400個人。
我見講股呢個事業上咗軌道，就裸辭咗基金份工，諗住自己全職經營呢盤生意。之後依家呢間嘅老闆搵我，佢同我嘅理念好對接，咁我上年咪入咗嚟做囉。
Kitty：你個facebook專頁已累積到過萬個Like，我哋每日影咁多扮女神嘅Selfie，都唔夠你呃到咁多Like，真係令人好葡萄喎！
譚：我覺得因為我對呢樣嘢好有興趣，所以會做得好投入同唔怕辛苦。我會分享好多行業資訊，有自己專業分析，同埋加咗好多娛樂元素，例如我睇完套戲會喺上面寫番個影評、分享自己食咗啲咩。呢個好似係我嘅生活網，投資係生活嘅一部分。
彩兒：你炒股向來睇重技術分析，有冇一招半式可以教吓我哋呀？
譚：首先係要明白「強者行強，弱者行弱」呢個道理，強勢股份永遠都會強，所以你唔使估頂，比如一隻股份扶住十天線上升，佢上到幾高都唔使沽，直到趨勢扭轉、失守十天線，咁咪沽囉。
入貨分兩注曉止蝕
例如滙控（00005）、渣打（02888），十天線都企唔穩，何必要估底去撈呢，撈完多數都係要坐艇。你識揀咪會揀騰訊（00700）呢啲股份囉，佢市好或市差都係會升，令你嘅生活過得易啲。
第二就係要分注，我買任何股份都會分兩注，第一注叫偷步，比如次次見一隻股份喺100蚊見底，有10蚊就先放2蚊落去，之後隻股再跌就斬咗佢；第二注係確認，如果呢隻股真係大反彈，先至放埋嗰8蚊落去。仲要識得止蝕，咁先可以令你嘅財富大漲小回。
Kitty：咁被人話係「財演」，你會唔會嬲先？
譚：咁又唔會喎，好多散戶炒股，令自己長期處高壓狀態，我會以輕鬆嘅方式同佢哋講財經，好似表演咁，做金融行業裏面嘅娛樂家，冇問題吖，加上我係有專業知識㗎嘛。
劉：阿仕特朗資本管理助理投資經理 劉明琪
不停諗「計」 磨練眼光
彩兒：你又係點入行做投資㗎？
劉：我喺港大經濟金融系畢業後，做過審計嘅工作，一一年入咗投資呢個行業，由買方分析員開始做起，之後加入咗依家呢間公司，做一個對沖基金嘅助理投資經理。我機緣巧合下做咗分析員，接觸股票後發覺好有趣，所以就鍾意咗呢行。
Kitty：呢行競爭咁大，你又有咩方法脫穎而出？
劉：都係盡力做㗎咋，等上司覺得我係可信任嘅人，咁就可有多啲工作。同埋我入咗行到依家仍不斷進修，大學畢業後，喺城大讀咗個專業會計深造文憑，又啱啱喺科大完成一個投資管理碩士課程，依家就考緊特許公認會計師資格。
投資好靠實戰，但我都希望透過進修增值自己，有多幾張刀喺身。其實，讀會計都幫到我睇公司盤數，例如課程之中，會教可換股債券、期權等係點樣入帳，讀咗之後，去睇上市公司年報，你就會更明白條數。
彩兒：依家咁多財經資訊，你寫專欄要吸引到讀者都唔易個喎。
劉：我覺得寫投資評論要寫啲代表自己嘅嘢，有自己嘅分析，好多專欄都係將股份財務報表嘅資料寫番落去，咁樣應該較難吸引到人。寫專欄嘅好處係可以逼自己思考，例如寫對環球市況一啲睇法，會逼到自己查清楚央行官員講過嘅嘢，變相令自己思路更清晰。
美息趨升不利金價
Kitty：咁你最近有冇睇啱啲咩趨勢呀？
劉：最近睇淡黃金，做咗啲沽空，至今都係有賺。其實，我長線係睇好金價，因為環球水浸，啲人唔係太信現金，但由於黃金係以美元計價，強美元通常不利金價，聯儲局早前話，未來幾個月可能加息，刺激美匯指數上升，令我相信金價短線會回落。
彩兒：近排個市好難捉摸呀，搞到我次次入市都損手，你又有咩對策呀？
劉：今個月聯儲局會進行議息，日本央行又會發表貨幣政策聲明，另有英國脫歐公投，同埋MSCI公布會否將A股納入國際指數，波動性會較強，所以我會做好多配對交易（Pair Trade），盡量減低基金嘅波動性。
睇好深港通概念股
我會留意好多行業，盡量避開金融股，買多啲深港通相關股份，同埋消費品企業，例如體育用品股。沽空方面會落重啲手，因成個經濟基本上都好差，睇完好多股份都揀唔落手，買股就用主題主導。做沽空會建基於好多基本分析，同埋一沽就成個板塊一齊沽，以防太受某一間公司嘅消息影響，比如突然私有呢啲事件。
若有料報畀彩兒同Kitty或有嘢問，可電郵money.biz@on.cc
彩兒 Kitty