多家券商預計深港通將於短期內推出，理論上六月首周兩地升市已預先反映消息，到底真係公布的話，會唔會呈好消息出貨，抑或係大派對的開始，就要做事後孔明了！
恒指上周五叩21,000點不果，成交略有增加，但後市一切都要睇月中MSCI結果同下旬英國公投結果。眨眼又過半年，首兩季至今無論大戶小戶都冇啖好食，呢個六月表現能否扭轉，將對第三季開局有頗大啟示，故本月投資者宜打醒十二分精神，總之做定兩手準備，謹慎應戰！
國新聞出版廣電總局發布《關於移動遊戲出版服務管理的通知》，自七月一日起，未經廣電總局批准的移動遊戲，不得上網出版營運。咁講法，現成的手機遊戲競爭則有望暫時紓緩，但未來新手機遊戲須要較以往為長才可上線，意味推出新遊戲的時間會較長，會唔會影響板塊估值，就要靜觀其變。
講到手遊股，呢排騰訊（00700）股價破頂，帶動科網股表現，手遊板塊亦見活躍。其中，IGG（00799）上周五股價急升7.98%，收報4.06元，成交9,934萬元，較五月中旬起步位3.3元水平，唔聲唔聲經已升咗超過兩成，成功破位。
股價已累升一定幅度，其中一個原因，會唔會係諗住深港通開車，呢隻會係北水目標股？還記得去年大時代，呢類手遊股都係炒得癲狂。純睇走勢，短線回吐守穩4元關樓上，應該仲有下文，重要承接可參考250日線約3.6元。
司慕渢