Market Insight：環保股 光國有優勢

一係唔發火，發起火非同小可，近期港股挾淡倉確係勢如破竹，完全無理會成交配唔配合，上周五恒指一度攀升至兩萬一點關口，埋單升88點，收報20,947點，兩個多星期由低位累積挾高逾1,300點。

古勝已經講過，與傳統基金大戶risk on，沽防守股，掃入增長或周期股的玩法唔同。今轉挾淡，即使美國聯儲委員言論鷹味愈來愈濃，講到似層層唔係六月就七月加息咁款，可是大戶對公用及一些高息股依然是不離不棄，繼續加注。

中電控股（00002）啱啱創咗歷史新高74.2元，煤氣（00003）連升四個星期，一句講晒，大戶就係唔信美國息口今年加到幾多，我有我半厘唔夠拆入短錢，繼續在街外掃股掃債。

入摩或採漸進方式

月底英國脫歐公投有結果前，本來聯儲局郁手都講緊係五五波，五月就業數據曝光之後，更係坐定粒六，先掃除對新興市場股市的不明朗因素，大家可以專心睇住深港通同埋月中的MSCI對加入A股與否的檢討消息。

縱觀今日滬港通門前冷清，對於深港通，本來市場就唔應該有太大期望，尤其深圳疊水的炒家，唔少一早已經有港股投資戶口，北水南炒的憧憬，無疑是心理大於實際。

阿爺依然落力趕今年底前通車，揭穿了，又係為咗中國股票市場透過窗戶開放，博MSCI可以加A股入去權重指數，迫使全球追隨MSCI新興市場指數的基金，即使再唔願意，都要焗住買番多少A股，幫手托番住中國股市。

六月十四日結果會出台，依家街外估緊最大可能會循序漸進咁做，先將A股按5%比重納入MSCI新興市場指數，計落條數大約等於引入1,000億元人仔資金咁上下，未來全數納入可以達到萬八至兩萬億元人仔，以現時內地兩市每日成交約五、六千億元人仔，可以預期，措施初期肯定心理幫助大於實際，流入資金唔夠頂住半日成交。

券商股乘勢炒番轉

不過，年多前的滬港通還是歷歷在目，魚缸裏面有多少人真係深究到底多少資金因措施而湧入，聽古唔好駁古，知道純炒概念，又何必太過理性同個荷包過唔去，近排海通證券（06837）、中信證券（06030）、中國銀河（06881）及廣發証券（01776）浸浸上，氣勢如虹，一於唔理三七廿一，炒埋個零星期，玩到消息公布前夕落車。

環保股當中，大家較為熟悉的水務股應該有北控水務（00371）、粵海投資（00270）同光大國際（00257）等，今日講吓隻光國。早前瑞信發表研究報告，認為其垃圾處理業務未來或有正面驚喜，雖將目標價由15.5元下調至13.5元，不過就維持「跑贏大市」評級。

睇返光國去年業績，純利按年增加22%，收入增長34%至85.3億元，其中環保能源項目建造及運營收入按年升28.5%，佔總收入逾六成，呢瓣業務包括垃圾處理同垃圾發電廠，而水務項目收入只係佔總收入兩成左右。

事實上，每個國家都要面對「垃圾圍城」的問題，垃圾生產量大，興建焚化爐轉廢為能是不少國家的做法，而且呢個做法較為環保，中央對環境保護愈趨重視，相信未來行業有一定發展空間。

積極拓展垃圾發電

光國亦積極擴展垃圾發電業務，集團四月時取得山東臨沭垃圾發電項目；上月再宣布中標山東省萊陽市生活垃圾發電項目。該股上月中跌至7.6元呈圓底回升，目前企喺多條平均線之上，若可守穩50日線8.5元，下站先睇四月高位9.35元。

除咗光國之外，亦可以留意吓粵豐環保（01381），集團就更加專注做垃圾處理，主要喺廣東省，如在東莞、湛江等地營運垃圾發電廠，年初又以1.1億元人仔收購貴州垃圾電廠，未來或會布局更多地區，另集團去年收入及純利分別按年增長49%及42%。

走勢上，近兩、三個月一直喺3.5至3.8元區間上落，目前支持位喺3.48元，不失此水平，整固過後有望重返3.8元樓上。

古勝