Market Insight：網龍新業務有睇頭

昨日古勝話「除非A股發癲，否則港股在五月最後一個交易日難扭轉跌勢。」估唔到A股無厘頭發威，其實滬綜指早已由「3,000點保衞戰」退守至「2,800點保衞戰」，到咁上下就挾一劑。自從中證監上周五公布限制上市公司胡亂停牌之後，券商即時提高入摩機會至七、八成，仲預言深港通會公布推出「贈興」。

周一滬港通突然錄得較大額流入又繪聲繪影話外資撈底。不過，滬綜指始終在2,800至3,000點之間唔上唔落，股民心態都係在此波幅區「低買高沽」。

投資者未放下戒心

A股是否入摩仲要等多半個月，但MSCI指數變動在昨日收市後生效，即帶動港股昨日成交衝破千億元，比重下降之騰訊（00700）反升2%再破頂，淨係呢隻成交已近百億元。

照例最後一分鐘係高潮，該分鐘已佔全日總股數成交接近四成。不過，恒指由最多升300點，收窄至收市僅升185點，投資者對今日公布之中國PMI存在戒心。

仲有一隻股在最後一分鐘見異動，但卻同MSCI指數變動無關，阿里健康（00241）是也！尾市抽高3.6%，並創去年底以來高位，而且是自二月中低見3.5元之後，一直沿住條上升軌回升近六成。另一隻恒大健康（00708）更是單日大升24.5%，但卻是在今年累跌逾半後，在1蚊樓下大後抽。

健康的確無價，淨係健康兩字已係無盡概念。不過，昨日未見有正面消息，只係「天貓醫藥館」通知商戶暫停第三方平台藥品網上零售業務，阿里健康更曾股價先跌近2%。至於為何尾市逆轉亦只能參考「路邊社」消息，並講到公司在上周四宣布與65間連鎖藥店組成「中國O2O先鋒聯盟」，原因就係預先得知天貓醫藥館藥品業務被叫停，所以及早開拓其他業務。

藥品監管愈趨嚴格

其實，阿里系今年流年不利，母公司在美國亦被調查會計手法問題，阿里健康在二月公布「藥品電子監管叫停，或嚴重影響收入」，消息導致股價大跌，但在此三個月內又很快重生，究竟呢個「O2O先鋒聯盟」係咪咁犀利真係要放長雙眼。

之但係，中國對醫藥行業之監管肯定將愈來愈嚴格，前有假疫苗，後有「魏則西事件」，離譜到武警醫院竟然成個科外判；在雷厲風行之下，至今已有近50家藥企被吊銷GMP認證。

網上賣藥較難管，所以暫時需「一刀切」。阿里健康個「O2O先鋒聯盟」講到可引入遠程診療、智能檢測血壓、血糖及心電等咁巴閉，但如何過監管當局一關才是最重要。健康雖然無價，惟阿里健康現市值463億元，只係相信馬雲個大名。

經濟放緩下，但對教育行業影響不大，加上內地中產階層對優質教育的需求漸殷，未來行業發展空間大，其中楓葉教育（01317）及網龍（00777）值得留意。

楓葉教育在內地開辦國際學校，提供幼兒園至第十二級的雙語教育服務。截至二月底止中期業績，集團純利按年增長1.2倍至1.25億元人仔，收入則上升26.7%，期內，集團共開設46間學校。昨日摩通亦發表報告唱好，指其擴張速度較預期快，將其目標價由7元上調至8元，維持「增持」評級。

該股去年九月開始持續向上，昨日再創新高，升8%收報6.97元，盤中一度高見7.22元。由於該股已連升七日，目前14日RSI達78，已落入超買區，短期或有調整，可候回調至6元邊再考慮收集。

致力強化教育軟件

網龍本業係做手遊，近年積極發展教育軟件業務，舊年斥資約10億元收購全球互動教學設備供應商Promethean。去年度來自教育的收益按年增加6.4倍，佔總收益比例由一四年的3.4%增至近兩成，成為新的增長動力。

集團早前公布將與ARHT Media組合資公司，另透過旗下公司收購Cherrypicks Alpha全部股權，以拓展AR及VR業務，相關技術除可用於遊戲業務，其可應用在教育軟件，有利集團增強教育業務。

網龍上周五以大陽燭一舉收復多條移動平均線，近日亦守在其上，昨日收報25元，上升3.5%，成交趨活躍，有勢挑戰四月高位27元水平。

古勝