絲絲講場:創板驚現「高登達哥股」

依家啲上市儀式,真係估佢唔到。上個月建築股聯旺(08217)掛牌,竟然見到翠如BB真身,原來係佢Daddy生意,今次又畀絲絲喺上市儀式見到啲估佢唔到嘅人。講緊尋日掛牌嘅創業板新股永駿國際(08187),高登男神達哥(林慧韡)竟晨咁早出現喺港交所。

達哥係邊位?佢咪係舊年年底KO咗子華同發哥,做咗高登男神總選冠軍嗰位。睇電視實有見過佢,賣藥廣告有佢份、旅遊網廣告又見佢(咪就係嗰位鵰兄囉)。尋日,絲絲幾想聽到佢親口用「達朝話」講句「格勒古,把,格啦加Glo」(譯番人話係:你好嗎?我叫達哥),點知冇喎。

話時話,達哥出名打機,永駿主業做鞋,大纜都扯唔埋喎?唔通繼翠如BB股之後,再來隻達哥股?

Friend底撐永駿上市

聽講今次係永駿國際執董何建邦(Hoby)請佢嚟嘅,Hoby話同達哥係朋友。佢哋有咩淵源?原來,永駿國際主席兼行政總裁何建偉(Ken)同Hoby兩兄弟,二○一三年開咗間手機遊戲公司Ever App,當時就搵嚟達哥做副總裁,盤手遊生意投資過千萬,唔怪得達哥肯晨咁早嚟捧場。

有咗達哥加持,唔知永駿股價能否Keep住蒸蒸日上呢可?絲絲忽然又諗起翠如BB股添。

余絲韻