絲絲講場：全球巨企內銀佔三甲

二○一六年《福布斯》全球2,000大企業榜出爐，頭三位繼續由工行（01398）、建行（00939）、農行（01288）冧莊，中行（03988）今年就排第6（跌咗兩位）。

唔係淨得銀行威晒。三甲之後，輪到股神巴菲特嘅投資旗艦巴郡；至於近期iPhone銷情唔夠好，但係Apple咁多年積聚雄厚實力同現金，都仲可以霸到第8位。

如果唔係日本豐田排第10攝住個位，咁世界10大企業就清一色中、美企業天下。中、美係世界所謂兩大強國，咁形勢都好正常。

滙控第7跌落14

大家至熟悉嘅滙控（00005）呢？唔好意思，上年仲排第7位，今年已經跌到落第14位。不過，獅子股東們唔使驚，九叔坐大廳（「九叔」即是滙控CEO歐智華，財經界係咁叫佢），話晒滙控近年剝離咁多業務，苗條晒，規模大唔大係其次，最緊要賺多啲，保持派高息，係咪？

余絲韻