Market Insight：挾淡倉 升市恐短癮

港股挾淡催化劑，緣於道指隔晚升213點收，論大方向，一四年底開始，道指三番四次升抵萬八點，企唔得耐都行返轉頭，投資者會唔會高興得太早？不妨放長雙眼睇埋後續發展。

對近排美股，古勝承認有點不安，並唔係怕聯儲局夠膽唔等英國脫歐公投，在下月會議趕加息，反而要留意，五月底、六月初聯儲兩次小規模賣債，雖然涉及講緊億幾美金，在確認收水的大方向上卻意義非凡。

有興趣的看官可以搵網上資料睇睇，海嘯後三輪QE，美股條完美直線升浪，基本上同聯儲資產規模膨脹速度同步，簡單講，個升市基本上係「印出嚟」，確認收水個市會點反應，有待觀察，假如美股純屬虛火，A股又死死吓，只怕港股叻唔到去邊！

濠賭股炒底被打窒

昨日穆迪降低澳門主權評級，下調信用評級至AA3，展望負面，理由是經濟顯著轉差，經濟增長不穩及博彩收入下跌。中國反貪腐，加埋經濟持續放緩，其實訪澳旅客早於一四年見頂，進入橫行階段。賭客荷包無咁鬆動，直接影響澳門博彩收入。

自一四年上旬開始，由月月增長到月月倒退，數據已經一清二楚，近排個市炒底，兩隻藍籌濠賭股彈咗唔少，昨日金沙（01928）仲見埋一個月新高，捧場客要小心降級消息打窒今浪反彈。

鞋王百麗國際（01880）業績倒退三成八，撇除一次過商譽及其他無形減值，亦要跌近兩成。該股昨日微跌0.4%報4.73元。大行的睇法中性至偏淡，瑞銀睇到落3.5元。其股價由去年大時代累積跌咗三分二，不利因素點都反映得七七八八，昨開高收低唔係好兆頭，據聞賓架聽到公司對電子商貿的挑戰，要轉型的口氣聽落信心唔大，結果炮製出即市反高潮走勢。

多隻煤炭股昨日升勢凌厲，神華（01088）升6%，兗煤（01171）升8%，而中煤（01898）升幅最大，升9.2%。事緣有內媒引述業內權威人士的言論，指大型媒企六月或會上調動力煤價格，且預計電廠及鐵路煤價都會跟隨上升，刺激板塊做好。

煤股跟炒要識落車

喺供給側改革之下，去產能的工作持續進行，扶持政策不斷出台，例如財政上的支持，早前財政部話將安排1,000億元人仔專項獎補資金支持鋼鐵、煤炭行業化解過剩產能。另外，國務院亦要求今明兩年，央企現有鋼鐵及煤炭產能要減一成，為去產能訂下目標。

不過，睇番煤企的業績，神華首季純利倒退近三成，四月煤銷量按年下跌13%；中煤首季更蝕4.5億元人仔，集團仲預計今年中期業績有機會見紅。

雖然中央大力支持行業發展，政策出台之後，都要睇番實際成效有幾大，要令供求回復平衡，相信仍要一段時間，煤企業績短期內未會見到改善。

煤炭股喺消息帶動下，短期或有反彈，但基本因素冇改善，升勢難以延續，小注短炒要把握食胡機會，長線投資就無謂考慮。

古勝