絲絲講場：巨鱷揭15條賺錢鐵規

王沿好傳奇，佢做過知青、工人、入伍、入大學，滙豐紐約總部亞洲證券部阿頭，依家係Bridgewater中國區總裁。

呢啲大鱷中嘅大鱷個腦究竟諗乜？啲錢點賺？以下就係王沿開壇時講嘅。袋到幾多？睇你造化。

索羅斯能人所不能

〈1〉對沖基金係要賺高於市場嘅回報。

〈2〉對沖基金賺錢係零值博弈，即係賺人哋蝕嘅錢。

〈3〉對沖基金非常注重剖析事物嘅因果關係，無限分解基本面，再睇埋各類資產之間喺市場入面嘅相互作用。（佢舉麥當勞雞件做例，其實雛雞價格佔比非常低，雞件成本主要反而係飼料價格，包括玉米與豆粕。只要將呢兩個商品做期貨，就可以對沖實物風險）

〈4〉基金經理最值錢係往績，其次係危機中嘅表現，唔係每個危機都賺到錢。

〈5〉大部分對沖基金賺嘅錢都係Beta，大部分人好難賺到Alpha。（Alpha係主動投資所得嘅超額收益，可簡單理解為股票型基金；Beta係同市場整體保持一致嘅投資組合，可理解為指數基金）

〈6〉能賺到Alpha嘅人好少，索羅斯係其中一個；其實好難分得到一個人到底係行運，定係有眼光。

資產分配相關性要低

〈7〉搞金融投資時，一啲創新嘅嘢，可能使你立於不敗之地。

〈8〉無法預測市場第二日會點，但可預知嘅係市場回報，長期計可跑贏現金。

〈9〉一旦市場開始跌，幅度與長度會比預期長得多。

〈10〉資產雖各有特性，但按照風險調準到某個水平，之後嘅回報就會差唔多。

〈11〉風險調整之後嘅回報係最重要嘅。

〈12〉如果能將各類資產按照風險來平衡分配，會得到非常穩定投資回報。

〈13〉資產相關性低，風險就大減。如果能搵到10個到15個相關性在於10至20%嘅產品，咁就非常完美。

每周要捱70粒鐘

〈14〉價格係由意外決定嘅，即是事件實際發生嘅情況與市場預期間嘅差異，就決定咗投資回報。

〈15〉市場規模夠大，就會出現非常傑出嘅人。好多人眼光唔差過馬雲，差就只係差在市場規模。

想做對沖基金大鱷？王沿話Bridgewater請人有3大原則：共同價值觀同風險容忍程度、逆向思考、技能最唔重要，事關可以學。最重要係唔多請讀金融嘅。仲有，入得去就預咗每星期做足70個鐘以上。

余絲韻