就咁嘅，早排有市民啲網上銀行戶口，喺未經授權情況下，被人擅用嚟買賣股票，喺依個風高浪急市況下，畀人拎錢亂投股市，真係同倒錢落海無乜分別。之但係，呢啲被選中嘅戶口原來係無得輸嘅。
尋日金管局上立法會匯報時，副總裁阮國恒透露，被人盜用嚟買賣股票嘅戶口，輸贏各有一半，輸咗錢嘅戶口，銀行已經同客戶處理賠償。奇就奇在，贏錢嘅戶口，啲錢就咁入咗個客袋！咁樣仲唔係無得輸！有議員聽到都話「遇到賊都賺錢，真係行運行到落腳趾尾」。
就算啲錢落得袋，被人盜用戶口，嚇都嚇餐飽，如果真係行運行到落腳趾尾，絲絲寧願唔好畀黑客揀中。
余絲韻